جعفرآباد: ڈپٹی کمشنر خالد خان کا ترقیاتی اسکیموں کا دورہ، معیار پر سمجھوتہ نہ کرنے کی ہدایت

جعفرآباد: ڈپٹی کمشنر جعفرآباد خالد خان نے ضلع بھر میں جاری مختلف ترقیاتی اسکیموں کا دورہ کرکے ترقیاتی امور کا باریک بینی سے جائزہ لیا اور منصوبوں پر ہونے والی پیش رفت سے آگاہی حاصل کی۔

سب ڈویڑنل آفیسر کی بریفنگ

ایگزیکٹو انجینئر مواصلات و تعمیرات بلڈنگز جعفرآباد عتیق الرحمن کی ہدایات کی روشنی میں سب ڈویڑنل آفیسر محمد صدیق زہری نے ڈپٹی کمشنر کو گورنمنٹ بوائز اسکول، ڈگری کالج اور سول ہسپتال کے ترقیاتی منصوبوں کے متعلق تفصیلی بریفنگ دی اور جاری تعمیراتی کاموں کے معیار، پیش رفت اور دیگر امور سے آگاہ کیا۔

معیار پر سمجھوتہ نہ کرنے کی ہدایت

ڈپٹی کمشنر خالد خان نے متعلقہ حکام کو ہدایات جاری کرتے ہوئے کہا کہ تمام ترقیاتی منصوبوں کو پی سی ون میں طے شدہ معیار اور مقررہ مدت کے اندر مکمل کرنے کے لیے تمام دستیاب وسائل بروئے کار لائے جائیں اور تعمیراتی کاموں میں معیار پر کسی قسم کا سمجھوتہ نہ کیا جائے۔

انہوں نے کہا کہ مذکورہ منصوبوں کا تعلق تعلیم اور صحت جیسے اہم شعبوں سے ہے، اس لیے ان کی بروقت اور معیاری تکمیل انتہائی ضروری ہے تاکہ طلبہ، مریضوں اور عام شہریوں کو بہتر سہولیات میسر آسکیں۔

انہوں نے متعلقہ افسران کو ہدایت کی کہ ترقیاتی کاموں کی مسلسل نگرانی یقینی بنائی جائے اور تمام منصوبوں کو مقررہ معیار کے مطابق جلد مکمل کرکے عوام کو ان کے ثمرات سے مستفید ہونے کا موقع فراہم کیا جائے۔

تصویر: بشکریہ ڈی جی پی آر بلوچستان