ہانگ کانگ سکسز: افغانستان پہلی بار چیمپئن، فائنل میں آسٹریلیا کو 4 وکٹوں سے شکست

ہانگ کانگ: ہانگ کانگ سکسز ٹورنامنٹ میں افغانستان نے تاریخ رقم کرتے ہوئے پہلی بار ٹائٹل اپنے نام کر لیا۔ ٹورنامنٹ کے فائنل میں افغانستان نے آسٹریلیا کو 4 وکٹوں سے شکست دی۔

آسٹریلیا کا دیا گیا 116 رنز کا ہدف افغان ٹیم نے صرف 5.1 اوورز میں حاصل کر لیا اور پہلی بار ہانگ کانگ سکسز کا چیمپئن بننے کا اعزاز حاصل کیا۔

دوسری جانب پاکستان نے پلیٹ فائنل میں عمان کو 18 رنز سے شکست دے کر کامیابی حاصل کی۔ پاکستان نے پہلے بیٹنگ کرتے ہوئے مقررہ اوورز میں 4 وکٹوں کے نقصان پر 154 رنز بنائے۔

پاکستان کی جانب سے کپتان عباس آفریدی نے جارحانہ بیٹنگ کرتے ہوئے صرف 16 گیندوں پر 73 رنز کی طوفانی اننگز کھیلی اور ٹیم کو بڑا اسکور بنانے میں اہم کردار ادا کیا۔

155 رنز کے ہدف کے تعاقب میں عمان کی ٹیم مقررہ اوورز میں 136 رنز ہی بنا سکی، یوں پاکستان نے پلیٹ فائنل 18 رنز سے جیت لیا۔