وزیراعلیٰ ہاؤس پر چھاپے کی خبریں بے بنیاد، شاہد رند کی تردید

کوئٹہ: وزیراعلیٰ بلوچستان کے معاون برائے اطلاعات و سیاسی امور شاہد رند نے وزیراعلیٰ ہاؤس پر چھاپے سے متعلق سوشل میڈیا پر گردش کرنے والی خبروں اور افواہوں کی سختی سے تردید کی ہے۔ انہوں نے انہیں بے بنیاد، من گھڑت اور حقائق کے منافی قرار دیا۔

انہوں نے واضح کیا کہ نہ ایسا کوئی واقعہ پیش آیا ہے اور نہ ہی وزیراعلیٰ ہاؤس پر کسی قسم کا چھاپہ مارا گیا ہے۔

ایک بیان میں شاہد رند نے کہا کہ وزیراعلیٰ بلوچستان میر سرفراز بگٹی کے خلاف سوشل میڈیا پر منظم انداز میں منفی اور گمراہ کن پروپیگنڈا کیا جا رہا ہے، جس کا مقصد وزیراعلیٰ کی کردار کشی اور صوبے میں بے یقینی و عدم اعتماد کی فضا پیدا کرنا ہے۔

ان کے مطابق حکومت کی کارکردگی سے خائف بعض عناصر جھوٹی اور من گھڑت خبروں کے ذریعے عوام میں غلط تاثر پیدا کرنے اور حکومتی ساکھ کو متاثر کرنے کی کوشش کر رہے ہیں۔

شاہد رند نے کہا کہ ملک دشمن عناصر سوشل میڈیا کو منفی پروپیگنڈے کے لیے استعمال کر رہے ہیں اور حکومتی اداروں اور قیادت کے خلاف بے بنیاد خبریں پھیلا رہے ہیں۔ تاہم حقائق کو مسخ کرنے اور عوام کو گمراہ کرنے کی ایسی کوششیں کامیاب نہیں ہوں گی۔

معاونِ وزیراعلیٰ نے بتایا کہ سوشل میڈیا پر جھوٹی اور من گھڑت خبریں پھیلانے والوں کے خلاف قانونی کارروائی کے لیے نیشنل سائبر کرائم انویسٹی گیشن ایجنسی (NCCIA) سے رجوع کر لیا گیا ہے۔

انہوں نے کہا کہ جعلی خبریں پھیلانے، کردار کشی کرنے اور دانستہ طور پر گمراہ کن معلومات کی تشہیر میں ملوث عناصر کے خلاف قانون کے مطابق سخت کارروائی عمل میں لائی جائے گی۔ آزادیٔ اظہار کی آڑ میں جھوٹ، بہتان اور منظم کردار کشی کی اجازت نہیں دی جا سکتی۔

ایسے عناصر کو اپنی غیر ذمہ دارانہ سرگرمیوں کا قانونی جواب دینا ہوگا اور جھوٹا پروپیگنڈا کرنے والوں کو قانون کے کٹہرے میں لایا جائے گا۔