گوادر: گورنمنٹ گرلز ڈگری کالج میں یومِ اقبال کی پروقار تقریب، طالبات کا بھرپور حصہ

گوادر: گورنمنٹ گرلز ڈگری کالج گوادر میں شاعرِ مشرق علامہ محمد اقبال کو خراجِ عقیدت پیش کرنے کے لیے یومِ اقبال کی مناسبت سے ایک پروقار تقریب کا انعقاد کیا گیا، جس میں طالبات نے بھرپور جوش و جذبے کے ساتھ حصہ لیا۔

تقریب کی پیشکشیں

تقریب کا آغاز تلاوتِ کلامِ پاک اور نعتِ رسولِ مقبول سے ہوا۔ اس موقع پر طالبات نے علامہ اقبال کی فکر و شاعری پر مبنی تقاریر، کلام، ملی و فکری نظمیں، ٹیبلو اور ڈرامے پیش کیے، جبکہ شکوہ و جوابِ شکوہ کی خصوصی پیشکش بھی تقریب کا حصہ رہی۔

اس کے علاوہ علامہ اقبال کی زندگی اور فلسفۂ خودی سے متعلق کوئز مقابلے کا بھی انعقاد کیا گیا۔

مقررین کے خیالات

پرنسپل کالج پروفیسر سبین بلوچ نے خطاب کرتے ہوئے علامہ اقبال کے فلسفۂ خودی، نوجوان نسل کے لیے پیغام اور علمی و ادبی خدمات پر روشنی ڈالی۔ انہوں نے کہا کہ اقبال کا پیغام خود اعتمادی، خودداری، بلند حوصلے اور عملی جدوجہد کا درس دیتا ہے۔

انہوں نے طالبات پر زور دیا کہ وہ اقبال کے افکار کو اپنی عملی زندگی کا حصہ بناتے ہوئے علم و کردار کے ذریعے ملک و قوم کی ترقی میں اپنا کردار ادا کریں۔

اس موقع پر میڈم شہانہ، میڈم مریم پیربخش اور لیکچرار میڈم زرگل نے بھی علامہ اقبال کی زندگی، شاعری اور فلسفۂ حیات پر اظہارِ خیال کیا اور طالبات کو ان کے پیغام سے روشناس کرایا۔

تقریب کے اختتام پر پرنسپل پروفیسر سبین بلوچ نے نمایاں کارکردگی کا مظاہرہ کرنے والی طالبات میں نقد انعامات تقسیم کیے، جبکہ دیگر شرکاء کو تعریفی اسناد سے نوازا اور ان کی حوصلہ افزائی کی۔

تقریب کا مقصد طالبات میں فکرِ اقبال، خودی، خود اعتمادی اور علم و عمل کا شعور اجاگر کرنا تھا۔