گوادر: گورنمنٹ بوائز ہائی اسکول جدید میں یومِ اقبال، ڈپٹی ڈسٹرکٹ ایجوکیشن آفیسر حسن بلوچ مہمانِ خصوصی

گوادر: گورنمنٹ بوائز ہائی اسکول جدید میں شاعرِ مشرق علامہ ڈاکٹر محمد اقبال کے یومِ ولادت کے موقع پر ایک پروقار تقریب منعقد ہوئی، جس کا آغاز تلاوتِ کلامِ پاک سے کیا گیا۔

تقریب کے مہمانِ خصوصی ڈپٹی ڈسٹرکٹ ایجوکیشن آفیسر گوادر حسن بلوچ تھے، جبکہ دیگر مہمانوں میں طارق محمود، جمیل، مولانا عامر اور عبدالعزیز صاحب شامل تھے۔

مقررین کا خطاب

تقریب سے مہمانِ خصوصی اور دیگر مقررین نے خطاب کرتے ہوئے علامہ اقبال کی زندگی، فلسفۂ خودی، افکار و تعلیمات اور نوجوان نسل کی فکری و اخلاقی تربیت میں ان کی شاعری کی اہمیت پر روشنی ڈالی۔

مقررین نے کہا کہ اقبال کا پیغام خود اعتمادی، علم، عمل اور بلند کردار کا درس دیتا ہے، جو آج بھی نئی نسل کے لیے مشعلِ راہ ہے۔

اس موقع پر اسکول کے طلبہ نے بھی تقاریر پیش کیں اور علامہ اقبال کے افکار و پیغام کو اجاگر کرتے ہوئے انہیں خراجِ عقیدت پیش کیا۔

تقریب کا مقصد طلبہ میں اقبال کی فکر، قومی شعور اور علم و آگہی کے جذبے کو فروغ دینا تھا۔

تصویر: بشکریہ ڈی جی پی آر بلوچستان