اوستہ محمد: اسسٹنٹ کمشنر ماریہ شمعون کی نگرانی میں ٹریفک کے لیے رکشے گنداخہ بس اڈے منتقل

اوستہ محمد: شہر میں ٹریفک کا نظام منظم بنانے، مرکزی شاہراہوں پر غیر ضروری رش ختم کرنے اور شہریوں کو آمدورفت کی بہتر سہولیات فراہم کرنے کے لیے ڈپٹی کمشنر اوستہ محمد کی خصوصی ہدایات پر ضلعی انتظامیہ نے عملی اقدامات کا آغاز کر دیا ہے۔

اس سلسلے میں اسسٹنٹ کمشنر اوستہ محمد محترمہ ماریہ شمعون کی زیرِ صدارت ایک اہم اجلاس منعقد ہوا، جس میں تحصیلدار، چیف آفیسر میونسپل کمیٹی اور صدر رکشہ ایسوسی ایشن نے شرکت کی۔

اجلاس میں شہر کے مختلف علاقوں، بالخصوص مرکزی شاہراہوں اور اہم چوکوں پر رکشوں کی غیر منظم پارکنگ کے باعث ٹریفک کی روانی میں پیدا ہونے والی رکاوٹوں کا تفصیلی جائزہ لیا گیا۔

اجلاس میں باہمی مشاورت سے فیصلہ کیا گیا کہ شہر میں ٹریفک کے نظام کو بہتر بنانے کے لیے تمام رکشوں کو گنداخہ بس اڈہ منتقل کیا جائے گا، جبکہ ریلوے پھاٹک سے شبیر چوک تک رکشوں کی پارکنگ پر مکمل پابندی عائد ہوگی۔

اس اقدام کا مقصد مرکزی شاہراہوں کو ٹریفک کے لیے کھلا رکھنا، ٹریفک جام سے بچاؤ اور پیدل چلنے والوں سمیت تمام شہریوں کو آمدورفت میں سہولت فراہم کرنا ہے۔

فیصلے پر عملدرآمد

اجلاس کے فوری بعد اسسٹنٹ کمشنر ماریہ شمعون نے متعلقہ افسران کے ہمراہ موقع پر پہنچ کر فیصلے پر عملدرآمد یقینی بنایا اور شہر میں موجود تمام رکشوں کو مقررہ مقام گنداخہ بس اڈہ منتقل کروا دیا۔

اس موقع پر رکشہ ایسوسی ایشن کے نمائندوں کو بھی انتظامیہ کے فیصلے پر عملدرآمد اور ٹریفک نظم و ضبط برقرار رکھنے کے لیے تعاون کی ہدایت کی گئی۔

اسسٹنٹ کمشنر ماریہ شمعون نے کہا کہ شہر میں ٹریفک کی روانی برقرار رکھنے اور عوام کو درپیش مشکلات کے خاتمے کے لیے کیے گئے اقدامات پر مستقل بنیادوں پر عملدرآمد جاری رکھا جائے گا۔

متعلقہ ادارے اس نظام کی مسلسل نگرانی کریں گے تاکہ دوبارہ غیر قانونی پارکنگ اور ٹریفک کی روانی میں رکاوٹ پیدا نہ ہو۔

ضلعی انتظامیہ کے مطابق شہر میں ٹریفک کے نظام کو بہتر بنانا اور شہریوں کو محفوظ، آسان اور بلا رکاوٹ سفری سہولیات فراہم کرنا انتظامیہ کی ترجیحات میں شامل ہے، جس کے لیے تمام متعلقہ اداروں کو باہمی رابطے اور ذمہ داری کے ساتھ اپنا کردار ادا کرنے کی ہدایات جاری کر دی گئی ہیں۔