ایف پی ایس سی کا گریڈ 16 سے 20 تک مختلف وفاقی محکموں میں بھرتیوں کا اعلان

اسلام آباد: فیڈرل پبلک سروس کمیشن (ایف پی ایس سی) نے وفاقی وزارتوں اور محکموں میں گریڈ 16 سے 20 تک کی مختلف اسامیوں پر بھرتی کے لیے اشتہار جاری کر دیا ہے۔ اسامیاں طبی، انتظامی، انجینئرنگ اور مالیاتی شعبوں سمیت دیگر شعبوں میں ہیں۔

اشتہار کے مطابق آڈیٹر جنرل آف پاکستان کے تحت گریڈ 17 کے 160 اسسٹنٹ آڈٹ افسر بھرتی کیے جائیں گے۔ فیڈرل میڈیکل کالج میں گریڈ 17 کے 25 ڈیمانسٹریٹرز جبکہ وزارت منصوبہ بندی کے اکنامسٹ گروپ میں گریڈ 17 کی 12 اسامیاں رکھی گئی ہیں۔ وزارت منصوبہ بندی میں ڈپٹی چیف، اسسٹنٹ چیف اور ریسرچ افسران کی اسامیاں بھی شامل ہیں۔

شعبہ صحت میں پمز اسلام آباد کے لیے گریڈ 20 کے چھ پروفیسر اور گریڈ 19 کے دو ایسوسی ایٹ پروفیسر درکار ہیں۔ وزارت دفاع کے تحت آرمڈ فورسز انسٹی ٹیوٹ آف ری ہیبلی ٹیشن میڈیسن میں گریڈ 16 کی 10 نرسنگ اسامیاں ہیں، جبکہ جی ایچ کیو میں گریڈ 17 کے چار سویلین میڈیکل پریکٹیشنرز لیے جائیں گے۔

وزارت ریلوے میں گریڈ 17 کے تین اسسٹنٹ انجینئر، چار اسسٹنٹ ایگزیکٹو انجینئر، دو اسسٹنٹ کنٹرولر، دو اسسٹنٹ مکینیکل انجینئر اور ایک اسسٹنٹ ڈائریکٹر (لیگل) کی اسامیاں شامل ہیں۔

وزارت دفاع اور جی ایچ کیو کے تحت سائنسی، آرڈنینس، سیکیورٹی اور مالیاتی عہدوں پر بھی بھرتیاں ہوں گی، جن میں آرمڈ فورسز انسٹی ٹیوٹ آف پیتھالوجی کے دو جونیئر سائنٹفک افسر (گریڈ 16) شامل ہیں۔ وزارت قانون میں گریڈ 18 کا ایک اسسٹنٹ ڈرافٹسمین، وزارت مذہبی امور میں گریڈ 17 کا ایک اسسٹنٹ ڈائریکٹر اور نیشنل ہیریٹیج ڈویژن میں گریڈ 18 کا ایک ڈپٹی ڈائریکٹر درکار ہے۔ ڈویژن خزانہ میں گریڈ 18 کے بجٹ پبلیکیشن افسر کی اسامی بھی ہے۔

کمیشن نے گلگت بلتستان کے مختلف محکموں میں بھی بھرتیوں کا اعلان کیا ہے۔ کئی اسامیوں پر صوبائی، علاقائی اور خواتین کا کوٹہ مختص کیا گیا ہے۔ امیدواروں کو اہلیت، تعلیمی قابلیت، تجربے، عمر کی حد اور کوٹے کی تفصیلات کے لیے ایف پی ایس سی کا سرکاری اشتہار دیکھنے کی ہدایت کی گئی ہے۔