کوئٹہ: لعل جان جعفر کی انٹر اسکول بیڈمنٹن، اسپیلنگ بی اور سائنس اولمپیاڈ تقریب سے خطاب

کوئٹہ: سیکرٹری ثانوی تعلیم بلوچستان لعل جان جعفر نے کہا ہے کہ طلبہ و طالبات کی ذہنی، علمی اور جسمانی نشوونما کے لیے نصابی سرگرمیوں کے ساتھ غیر نصابی مقابلوں کا انعقاد انتہائی اہمیت کا حامل ہے۔

سائنس، کھیلوں اور تخلیقی سرگرمیوں کے فروغ سے طلبہ میں خود اعتمادی، تحقیق کا رجحان اور مثبت مسابقت کا جذبہ پروان چڑھتا ہے۔

انہوں نے 7 نومبر کو پاکستان چلڈرن اکیڈمی ٹرسٹ کوئٹہ کے زیر اہتمام منعقدہ انٹر اسکول بیڈمنٹن چیمپئن شپ، اسپیلنگ بی مقابلے اور سائنس اولمپیاڈ کے فائنلز اور تقسیم انعامات کی تقریب سے بطور مہمان خصوصی خطاب کیا۔

28 اکتوبر 2026 سے شروع ہونے والے ان مقابلوں میں کوئٹہ کے مختلف تعلیمی اداروں نے بھرپور شرکت کی۔ اسپیلنگ بی میں 45، سائنس اولمپیاڈ میں 135 اور بیڈمنٹن چیمپئن شپ میں 135 اسکولوں نے حصہ لیا۔

بیڈمنٹن مقابلے گرلز سنگلز، بوائز جونئر سنگلز اور بوائز سینئر سنگلز کی کیٹیگریز میں منعقد کیے گئے، جبکہ مجموعی طور پر 355 طلبہ و طالبات نے اپنی صلاحیتوں کا مظاہرہ کیا۔

نتائج اور تقسیم انعامات

سیکرٹری اسکولز نے پاکستان چلڈرن اکیڈمی ٹرسٹ کی جانب سے بچوں کی تعلیمی، سائنسی اور جسمانی تربیت کے لیے ایسے مقابلوں کے انعقاد کو قابل تحسین اقدام قرار دیا اور بیگم ثاقبہ رحیم الدین کی دوراندیشانہ اور دیرینہ کاوشوں کو خراج تحسین پیش کیا۔

انہوں نے کہا کہ بلوچستان میں سائنس کی تعلیم کے شعبے میں تاریخی طور پر تعلیمی نتائج تسلی بخش نہیں رہے، ایسے میں سائنس اولمپیاڈ جیسے مقابلے طلبہ میں تجسس، تحقیق، تخلیقی سوچ اور سائنسی علوم سے دلچسپی پیدا کرنے میں کلیدی کردار ادا کرتے ہیں۔

مقابلوں کے نتائج کے مطابق اسپیلنگ بی میں امت پبلک اسکول کوئٹہ نے پہلی جبکہ بیگم ثاقبہ اسکول آف ماڈرن ایج کوئٹہ نے دوسری پوزیشن حاصل کی۔ سائنس اولمپیاڈ میں امت پبلک اسکول اور پاک جناح ریزیڈنشل ہائی اسکول سیٹلائٹ ٹاؤن نے مشترکہ طور پر پہلی پوزیشن حاصل کی۔

بیڈمنٹن گرلز سنگلز میں امت پبلک اسکول کوئٹہ نے پہلی اور بیگم ثاقبہ اسکول آف ماڈرن ایج نے دوسری پوزیشن حاصل کی۔ بوائز جونئرز کیٹیگری میں پاک عرب انٹرنیشنل اسکول نے پہلی جبکہ سی بی اسکول نے دوسری پوزیشن حاصل کی۔ بوائز سینئرز کیٹیگری میں ہورائزن اسکول نے پہلی اور دوسری دونوں پوزیشنیں اپنے نام کیں۔

تقریب کے اختتام پر مہمان خصوصی لعل جان جعفر نے کامیاب طلبہ و طالبات میں ٹرافیاں، میڈلز اور اسناد تقسیم کیں، جبکہ مقابلوں میں حصہ لینے والے دیگر تمام شرکاء کی حوصلہ افزائی کے لیے انہیں بھی تعریفی اسناد پیش کی گئیں۔

انہوں نے عزم کا اظہار کیا کہ بلوچستان کے تعلیمی اداروں میں سائنس، کھیلوں اور دیگر مثبت ہم نصابی سرگرمیوں کے فروغ کے لیے ایسی کاوشوں کی حوصلہ افزائی جاری رکھی جائے گی۔

تصویر: بشکریہ ڈی جی پی آر بلوچستان