کوئٹہ: جوائنٹ روڈ پر فٹ پاتھوں سے تجاوزات کے خلاف کارروائی، مجسٹریٹ عمران زیب کاسی کی نگرانی

کوئٹہ: وزیر اعلیٰ بلوچستان میر سرفراز احمد بگٹی کے وژن اور میٹروپولیٹن کارپوریشن کوئٹہ کے ایڈمنسٹریٹر بشیر احمد بڑیچ کے خصوصی اقدامات کے تحت شہر میں تجاوزات کے خاتمے کے لیے کارروائیوں کا سلسلہ جاری ہے۔

عوامی شکایت پر مجسٹریٹ میٹروپولیٹن کارپوریشن کوئٹہ عمران زیب کاسی کی نگرانی میں سپروائزر عبدالحق بلوچ نے جوائنٹ روڈ پر فٹ پاتھوں پر مچھلی فروخت کرنے والے ریڑھی بانوں کے خلاف کارروائی کی۔

کارروائی کے دوران فٹ پاتھوں پر قائم تجاوزات ختم کر دی گئیں اور ریڑھی بانوں کا سامان اور دیگر رکاوٹیں ہٹا دی گئیں۔

مجسٹریٹ عمران زیب کاسی نے کہا کہ فٹ پاتھ عوام کی آمدورفت کے لیے مختص ہیں۔ انہیں تجاوزات سے پاک رکھنے کے لیے کارروائیاں جاری رہیں گی تاکہ شہریوں کو پیدل آمدورفت میں مشکلات کا سامنا نہ کرنا پڑے۔

انہوں نے کہا کہ شہر میں تجاوزات کے خلاف کارروائی بلا امتیاز جاری رہے گی اور اس سلسلے میں کسی سے کوئی رعایت نہیں برتی جائے گی۔

پولیس ٹریننگ کالج کوئٹہ میں دو اہلکاروں کا انتقال

پولیس ٹریننگ کالج کوئٹہ کے ترجمان کے مطابق پی ٹی سی کوئٹہ میں سابقہ لیویز فورس کے جوانوں کے لیے بنیادی اور پینٹیشن ٹیکٹیکل کورس مورخہ 06092026 سے جاری ہے، جس میں صوبہ بلوچستان کے تمام اضلاع کے اہلکار تربیت حاصل کر رہے ہیں۔

آج مورخہ 07112026 کو لاء کلاس کے دوران کانسٹیبل نمبر 1023C مرزا خان ولد قطب خان، ساکن ضلع ژوب، اچانک اپنی نشست پر بیٹھے بیٹھے کرسی سے گر گئے۔ انہیں شیخ خلیفہ بن زید ہسپتال کوئٹہ منتقل کیا گیا، جہاں وہ جانبر نہ ہو سکے۔ ڈاکٹروں کے مطابق ان کی وفات کی وجہ ہارٹ اٹیک تھی۔ میت تدفین کے لیے آبائی علاقے ضلع ژوب روانہ کر دی گئی۔

پولیس ٹریننگ کالج کوئٹہ کے ایک اور پریس ریلیز کے مطابق ریکروٹ کانسٹیبل سمیع اللہ، ساکن ضلع شیرانی، سینے میں تکلیف محسوس ہونے کے بعد دورانِ علاج انتقال کر گئے۔

29 اکتوبر 2026 کو ریکروٹ کورس کا آغاز ہوا تھا، جس کے لیے وہ 4 نومبر 2026 کو کالج پہنچے تھے۔ 5 نومبر کی صبح انہیں سینے میں تکلیف ہوئی تو کالج کی ڈسپنسری منتقل کیا گیا اور پھر شیخ خلیفہ بن زید ہسپتال کوئٹہ ریفر کیا گیا، جہاں دورانِ علاج وہ خالقِ حقیقی سے جا ملے۔ ہسپتال کے ڈاکٹر کے مطابق وفات کی وجہ ہارٹ اٹیک تھی۔ میت تدفین کے لیے ضلع شیرانی روانہ کر دی گئی۔