پیٹرولیم لیوی ختم کریں ورنہ سڑکوں پر آئیں گے، حافظ نعیم الرحمان کی حکومت کو دھمکی

کراچی: امیر جماعت اسلامی حافظ نعیم الرحمان نے کہا ہے کہ اگر لیوی کے حوالے سے حکومت نے اقدام نہیں کیا تو ہم پھر سڑکوں پر آئیں گے۔

ادارہ نور حق میں پریس کانفرنس سے خطاب کرتے ہوئے انہوں نے کہا کہ تین سال پہلے طوفانِ اقصیٰ اور جس طرح فلسطینیوں نے مزاحمت کی، اس کا بدلہ اسرائیلیوں نے عام انسانوں سے لینا شروع کیا اور پورے غزہ کو مسمار کر دیا۔ مزاحمت کیا ہوتی ہے، یہ فلسطینیوں نے سکھائی۔

پٹرول کی قیمتوں کے حوالے سے انہوں نے کہا کہ لیوی ختم کی جائے۔ انہوں نے اسحاق ڈار، ڈپٹی وزیراعظم سے کہا ہے کہ اسے ختم کریں۔ ہر مہینے 150 ارب روپے لیوی کی مد میں لیے جا رہے ہیں۔ آپ کے پاس کیا مکینزم ہے؟ اس پر ان کا کہنا ہے کہ ایک دو دن میں ہم نمبرز دے دیں گے۔

حافظ نعیم نے بتایا کہ اسحاق ڈار نے کہا کہ اگر لیوی ختم کر دیں گے تو بڑی گاڑی والے کو بھی سستا پیٹرول ملے گا، تو ہم نے کہا کہ ان کے لیے سو کے بجائے دو سو لیوی لیں۔ جو مہنگی گاڑی رکھ سکتے ہیں وہ لیوی بھی دے سکتے ہیں، لیکن متوسط طبقے اور غریبوں کو ریلیف دیا جائے۔

انہوں نے کہا کہ پیٹرولیم لیوی کے حوالے سے ہماری جدوجہد جاری ہے۔ وزیراعظم شہباز شریف سے ملاقات ہوئی، وزیراعظم نے مزید ریلیف دینے کے لیے وقت مانگا ہے۔ ہمارا ایک ہی مطالبہ ہے کہ پیٹرولیم لیوی ختم کی جائے۔

انہوں نے مزید کہا کہ پاکستان میں مرکز اور صوبوں میں جو حکومتیں ہیں، یہ سب فارم 47 کی پیداوار ہیں۔ کراچی کو ان لوگوں نے تباہ کر دیا ہے، کرپشن نے پورے سندھ کو تباہ کر دیا ہے۔

ایک نئے عالمی نظام کی ضرورت ہے جس میں مسلمانوں اور مزاحمت کاروں کو یکجا ہونا پڑے گا۔ انہوں نے کہا کہ وہ ترکیہ گئے، جہاں مسلک پرست اور فرقہ ورانہ باتیں نہیں ہوتیں بلکہ اسلام کی بات ہوتی ہے، جس سے پتا چلا کہ اسلام صرف ایک مذہب نہیں بلکہ ایک نظام کا نام ہے۔