سوراب: ڈپٹی کمشنر صاحبزادہ نجیب اللہ کا جھالاوان ماڈل پبلک ہائی اسکول کا دورہ

سوراب: ڈپٹی کمشنر سوراب صاحبزادہ نجیب اللہ نے ڈسٹرکٹ ایجوکیشن گروپ کے مرد و خواتین ممبران اور محکمہ تعلیم کی ٹیم کے ہمراہ جھالاوان ماڈل پبلک ہائی اسکول سوراب کا دورہ کیا۔ وہاں تعلیمی معیار، تدریسی سرگرمیوں، بنیادی سہولیات اور انتظامی امور کا جائزہ لیا گیا۔

اس موقع پر طلبہ و طالبات نے پی ٹی اور جسمانی ورزشوں کا عملی مظاہرہ کیا۔ ڈپٹی کمشنر نے ان سے نصابی سوالات بھی کیے اور ان کی تعلیمی صلاحیتوں، نظم و ضبط اور اعتماد کو سراہا۔

انہوں نے اسکول کی عمارت، کلاس رومز، صفائی، اساتذہ کی حاضری، ریکارڈ اور دیگر سہولیات کا بھی معائنہ کیا۔

اسکول انتظامیہ کی جانب سے اضافی معاوضے پر اساتذہ کی خدمات حاصل کر کے شام کے اوقات میں بھی مفت تعلیم فراہم کرنے کے اقدام کو ڈپٹی کمشنر نے قابل تحسین قرار دیا۔

نجی اسکولوں کی فیسوں اور سہولیات پر ہدایات

نجی اسکولوں کی سردیوں کی فیس کے معاملے پر ڈپٹی کمشنر نے واضح کیا کہ فیسوں کے تعین اور وصولی کے لیے باقاعدہ پالیسی اور ایس او پیز مرتب کیے جائیں گے تاکہ والدین اور طلبہ کے مفادات کا تحفظ یقینی بنایا جا سکے۔

انہوں نے نجی اسکولوں میں سائنس لیبارٹریز کی دستیابی اور فعالیت پر بھی زور دیا۔

ڈپٹی کمشنر نے محکمہ تعلیم کو ہدایت کی کہ ایک ہفتے کے اندر سوراب کے تمام نجی اسکولوں کا ریکارڈ، بالخصوص گزشتہ پانچ سال کی فیس وصولیوں اور تعلیمی سہولیات کا تفصیلی جائزہ لیا جائے تاکہ نجی تعلیمی اداروں کے لیے شفاف اور قابل عمل پالیسی تشکیل دی جا سکے۔