ایران: امریکا کا دوبارہ حملہ ہوا تو دنیا بھر میں امریکی اثاثے نشانے پر ہوں گے

تہران: ایران نے امریکا کو خبردار کیا ہے کہ اگر اس پر دوبارہ حملہ کیا گیا تو ایرانی فوج دنیا بھر میں امریکی اثاثوں کو نشانہ بنا سکتی ہے۔ ایرانی فوج نے واضح کیا ہے کہ اس کارروائی کے لیے کسی جغرافیائی حد کی پابندی نہیں ہوگی۔

الجزیرہ کے مطابق ایرانی فوج کے ترجمان محمد اکرمینیا نے کہا ہے کہ امریکا کی جانب سے دوبارہ حملے کی صورت میں ایران تمام امریکی اثاثوں کو نشانہ بنائے گا، چاہے وہ دنیا کے کسی بھی حصے میں موجود ہوں۔

یہ بیان ایسے وقت میں سامنے آیا ہے جب ایران اور امریکا کے درمیان کشیدگی برقرار ہے اور دونوں ممالک کے درمیان ممکنہ فوجی تصادم کے خدشات پر عالمی سطح پر تشویش پائی جاتی ہے۔

بیان سے ظاہر ہوتا ہے کہ تہران کسی نئے حملے کی صورت میں اپنے ردعمل کو صرف خطے تک محدود رکھنے کا عندیہ نہیں دے رہا۔ تاہم ترجمان نے اس بیان میں کسی مخصوص امریکی ہدف یا ممکنہ کارروائی کی تفصیلات نہیں بتائیں۔

ترجمان ایرانی فوج کے مطابق امریکا کے پاس آبنائے ہرمز کھلوانے کا واحد راستہ ایران کی 7 شرائط پر عمل درآمد ہے۔ ترجمان کا کہنا ہے کہ رہبرِ اعلیٰ نے کسی بھی جارحیت کا فوری جواب دینے کی اہمیت پر زور دیا ہے۔

اس سے قبل پاسدارانِ انقلاب نے کہا تھا کہ آبنائے ہرمز سے گزرنے کی کوشش کے دوران 2 آئل ٹینکروں میں آگ لگ گئی۔ پاسدارانِ انقلاب کے مطابق دونوں ٹینکرز غیر مجاز راستے سے گزر رہے تھے اور بارودی سرنگ سے ٹکرا گئے۔