ہانگ کانگ سکسز: پاکستان نے عمان کو 18 رنز سے ہرا کر پلیٹ فائنل جیت لیا

دبئی: پاکستان نے ہانگ کانگ انٹرنیشنل سکسز ٹورنامنٹ کے پلیٹ فائنل میں عمان کو 18 رنز سے شکست دے دی۔ مقابلہ مونگ کوک کے مشن روڈ گراؤنڈ میں کھیلا گیا۔

پاکستان نے پہلے بیٹنگ کرتے ہوئے مقررہ 6 اوورز میں 4 وکٹوں کے نقصان پر 154 رنز بنائے۔

کپتان عباس آفریدی نے 11 چھکوں اور ایک چوکے کی مدد سے صرف 16 گیندوں پر ناقابلِ شکست 73 رنز بنائے۔ عبدالصمد نے 7 گیندوں پر 4 چھکوں اور 2 چوکوں کی مدد سے 32 رنز بنائے، جبکہ احمد دانیال نے 5 گیندوں پر ناقابلِ شکست 25 رنز بنائے۔

جواب میں عمان کی ٹیم مقررہ 6 اوورز میں 4 وکٹوں پر 136 رنز بنا سکی۔ زوہیب امانت نے 18 گیندوں پر ناقابلِ شکست 61 رنز اور عثمان علی نے 17 گیندوں پر ناٹ آؤٹ 67 رنز کی جارحانہ اننگز کھیلی، تاہم ٹیم ہدف سے 18 رنز پیچھے رہ گئی۔

فیصلہ کن اننگز کھیلنے پر عباس آفریدی کو میچ کا بہترین کھلاڑی قرار دیا گیا۔