نیتن یاہو کا ٹرمپ پر ایران کے خلاف مشترکہ حملے کے لیے دباؤ، امریکی انتظامیہ میں اختلافات

تل ابیب: اسرائیلی وزیراعظم بن یامین نیتن یاہو امریکی صدر ڈونلڈ ٹرمپ پر زور دے رہے ہیں کہ امریکا اور اسرائیل ایران کے خلاف مشترکہ فوجی کارروائی کریں، اور اس کا آغاز امریکی وسط مدتی انتخابات کے فوراً بعد کیا جائے۔

امریکی میڈیا کے مطابق ٹرمپ انتظامیہ میں ایران سے نمٹنے کے طریقِ کار پر اختلافات پائے جاتے ہیں۔ انتظامیہ کے بعض عہدیدار تہران کے ساتھ مذاکرات دوبارہ شروع کرنے کے حامی ہیں، جبکہ دوسرے حکام ایران پر مزید فوجی حملوں کی حمایت کر رہے ہیں۔

دوسری جانب اسرائیلی ٹی وی چینل نے رپورٹ کیا ہے کہ اسرائیلی فوج نے ایران پر حملے کے لیے تمام تیاریاں مکمل کر لی ہیں۔ چینل کے مطابق اسرائیلی فوجی حکام کا خیال ہے کہ ایران کے ساتھ براہِ راست جنگ شروع ہونے کی صورت میں لبنان کی تنظیم حزب اللہ بھی محاذ کھول سکتی ہے۔

رپورٹ کے مطابق اسی خدشے کے پیش نظر اسرائیلی فوج شمالی محاذ سے ممکنہ ڈرون اور میزائل حملوں کا بیک وقت سامنا کرنے کی تیاریوں کا جائزہ لے رہی ہے۔

تاہم ایران پر کسی ممکنہ مشترکہ حملے کے حوالے سے امریکا یا اسرائیل کی جانب سے باضابطہ اعلان سامنے نہیں آیا۔ فی الحال یہ اطلاعات میڈیا رپورٹس اور متعلقہ ذرائع کے دعووں پر مبنی ہیں۔