مولانا فضل الرحمان کو متنازع بیانات واپس لینا ہوں گے: طلال چوہدری

اسلام آباد: وزیرِ مملکت برائے داخلہ طلال چوہدری نے کہا ہے کہ ریاست، مسلح افواج اور شہدا کے معاملے پر کوئی سمجھوتہ نہیں کیا جائے گا۔ مولانا فضل الرحمان نے جو متنازع باتیں کی ہیں، انہیں واپس لینا ہوں گی۔

میڈیا سے گفتگو میں طلال چوہدری نے کہا کہ مولانا فضل الرحمان سے کسی کی ذاتی لڑائی نہیں، ہم ریاست، مسلح افواج اور شہدا کے ساتھ ہیں۔ سیاست کا معیار اتنا نہیں گرانا چاہیے کہ شہادتوں کو متنازع بنا دیا جائے۔ شہادت کو زیر بحث لا کر سیاست کریں تو سیاست ہی ختم ہو جائے گی۔

انہوں نے کہا کہ وزیر داخلہ نے ابھی بہت تھوڑا بولا ہے، مزید بہت کچھ بولنا چاہتے ہیں، وزیر داخلہ موقع کی مناسبت سے اور بہت کچھ بھی کہیں گے۔

مولانا کی پارٹی کے لوگوں کی طرف سے وضاحتیں آ رہی ہیں، مولانا فضل الرحمان خود وضاحت دیں گے تو بات کہیں ٹھہر سکتی ہے۔

وزیرِ مملکت نے کہا کہ دہشت گرد کو دہشت گرد کہنا پڑے گا، دہشت گردوں کی مذمت اور ان کے خلاف کارروائیوں میں انہیں ہمارے ساتھ کھڑا ہونا پڑے گا۔ ہماری صرف یہی شرط ہے کہ دہشت گرد کو دہشت گرد کہا جائے۔