پنجاب میں چھوٹے کسانوں کو 3 کروڑ روپے تک بلا سود قرض دینے کا اعلان

لاہور: وزیراعلیٰ پنجاب مریم نواز نے صوبے کے زرعی شعبے کو مستحکم کرنے کے لیے چھوٹے کسانوں کو 3 کروڑ روپے تک بلا سود قرض فراہم کرنے کا اعلان کیا ہے۔ وہ کسانوں کے ایک وفد سے خطاب کر رہی تھیں۔

ان کے مطابق 3 کروڑ روپے سے زائد قرض لینے پر 2 فیصد جبکہ 5 کروڑ روپے تک کے قرض پر 5 فیصد سود ادا کرنا ہوگا۔

مریم نواز نے بتایا کہ کسان کارڈ پروگرام سے 10 لاکھ سے زائد افراد مستفید ہو رہے ہیں اور ہر کسان کو بوائی سے قبل ڈیڑھ لاکھ روپے کی مالی معاونت دی جا رہی ہے۔ ان کا کہنا تھا کہ گزشتہ دو برس میں کسانوں کی فلاح کے لیے کیے گئے اقدامات کی ماضی میں مثال نہیں ملتی۔

وزیراعلیٰ نے کہا کہ زرعی خدمات بہتر بنانے کے لیے اس سال ایک ہزار زرعی انٹرنز بھرتی کیے جائیں گے۔ ان کے بقول صوبائی حکومت نے کھاد اور زرعی اجناس کی بلیک مارکیٹنگ کا خاتمہ کر دیا ہے۔

انہوں نے گندم کی خریداری کے لیے 4500 روپے فی من امدادی نرخ کے نفاذ کو یقینی بنانے کی ہدایت کی۔ مریم نواز نے کہا کہ پنجاب ملک کی فوڈ باسکٹ ہے جو 70 فیصد غذائی ضروریات پوری کرتا ہے، جبکہ آم، کینو اور آلو سمیت دیگر فصلوں کی گریڈنگ اور اسٹوریج کے لیے جدید پراسیسنگ پارکس بنائے جا رہے ہیں۔

پانی کی تقسیم پر انہوں نے کہا کہ پانی چوری کے خلاف سخت کریک ڈاؤن جاری ہے تاکہ ہر کسان کو اس کے حصے کا پانی ملے اور پانی نہروں کی ٹیل تک پہنچے۔

وزیراعلیٰ کے مطابق پنجاب کسان بینک کے قیام کا کام مکمل ہو چکا ہے اور اسے جلد فعال کر دیا جائے گا۔ اس کا مقصد کسانوں کو بینکاری سہولیات تک آسان رسائی دینا ہے۔