پولیس ٹریننگ کالج کوئٹہ کا ریکروٹ کانسٹیبل سمیع اللہ دورانِ تربیت انتقال کر گیا

کوئٹہ: پولیس ٹریننگ کالج کوئٹہ میں زیرِ تربیت ریکروٹ کانسٹیبل سمیع اللہ آج صبح سینے میں تکلیف کے بعد دورانِ علاج انتقال کر گئے۔ ترجمان پولیس ٹریننگ کالج کوئٹہ کے ایک پریس ریلیز کے مطابق مرحوم کا تعلق ضلع شیرانی سے تھا اور ان کا ریکروٹ نمبر 09RC تھا۔

پریس ریلیز کے مطابق پولیس ٹریننگ کالج کوئٹہ میں 29 اکتوبر 2026 سے ریکروٹ کورس کا آغاز ہوا تھا، جس کے لیے بلوچستان کے تمام اضلاع سے منتخب نوجوانوں کو تربیت کے لیے کالج میں رپورٹ کرنے کی ہدایت کی گئی تھی۔ اسی سلسلے میں ریکروٹ کانسٹیبل سمیع اللہ 4 نومبر 2026 کو تربیت کے لیے کالج پہنچے تھے۔

ترجمان کے مطابق 5 نومبر 2026 کی صبح سمیع اللہ کو اچانک سینے میں تکلیف محسوس ہوئی، جس پر انہیں فوری طور پر کالج کی ڈسپنسری منتقل کیا گیا۔ ابتدائی طبی معائنے کے بعد ڈاکٹر نے مزید علاج کے لیے انہیں شیخ خلیفہ بن زید ہسپتال کوئٹہ ریفر کیا، جہاں دورانِ علاج ان کا انتقال ہو گیا۔ ہسپتال کے ڈاکٹر کے مطابق ان کی وفات کی وجہ ہارٹ اٹیک تھی۔

مرحوم کی نمازِ جنازہ اور دیگر ضروری کارروائیوں کے بعد میت کو تدفین کے لیے ان کے آبائی علاقے ضلع شیرانی روانہ کر دیا گیا۔

پولیس ٹریننگ کالج کوئٹہ کی انتظامیہ نے اس افسوسناک واقعے پر گہرے دکھ اور رنج کا اظہار کیا ہے۔ انتظامیہ نے مرحوم کے اہلِ خانہ سے دلی تعزیت کرتے ہوئے دعا کی ہے کہ اللہ تعالیٰ مرحوم کو جوارِ رحمت میں جگہ عطا فرمائے اور پسماندگان کو یہ صدمہ برداشت کرنے کا حوصلہ دے۔