سرکاری پروپیگنڈا اصل مسائل سے توجہ ہٹانے کی کوشش ہے، مولانا فضل الرحمن

اسلام آباد: جمعیت علماء اسلام کے سربراہ مولانا فضل الرحمن نے کہا ہے کہ سرکاری مشینری کے ذریعے منفی پروپیگنڈا کرنے کا مقصد ملک کو درپیش بحرانوں اور عوامی حقوق کے بارے میں جماعت کے مضبوط قومی مؤقف سے توجہ ہٹانا ہے۔ ان کے مطابق جمعیت علماء اسلام اپنے اصولی موقف پر قائم ہے اور اس میں کسی قسم کی تبدیلی ممکن نہیں۔

مولانا فضل الرحمن نے یہ بات اسلام آباد میں جمعیت علماء اسلام بلوچستان کے صوبائی امیر سینیٹر مولانا عبدالواسع سے ملاقات کے دوران گفتگو کرتے ہوئے کہی۔ انہوں نے کہا کہ عوامی حقوق، معدنیات اور قدرتی وسائل کی لوٹ مار، گورنر راج کے نفاذ اور قومی ذخائر پر قبضے کے خلاف جماعت کا موقف واضح اور دوٹوک ہے۔ ان کا کہنا تھا کہ یہ وہ معاملات ہیں جن کا تعلق براہ راست عوام اور ملک کے مستقبل سے ہے، اس لیے ان پر کسی طرح کی مصلحت اختیار نہیں کی جا سکتی۔

جمعیت علماء اسلام کے سربراہ نے ملک کی معاشی بدحالی اور عوامی زبوں حالی کا ذکر کرتے ہوئے کہا کہ ان کے خلاف جماعت کی جدوجہد جاری رہے گی۔ انہوں نے اس بات پر زور دیا کہ حکومتی سطح پر اصل مسائل کے حل پر توجہ دینے کے بجائے مخالفانہ مہم چلائی جا رہی ہے، جس کا مقصد رائے عامہ کو اصل سوالات سے دور رکھنا ہے۔

مولانا فضل الرحمن نے شکوہ کیا کہ ان کے اور جماعت کے دیگر قائدین کے خلاف منفی سازشوں، مضحکہ خیز اور غیر اخلاقی مہم کا سلسلہ جاری ہے۔ ان کے بقول ایسی مہمات قومی وقار اور جمہوری اقدار کے منافی ہیں اور ان سے سیاسی ماحول پر برا اثر پڑتا ہے۔

ملاقات میں بلوچستان کے صوبائی امیر سینیٹر مولانا عبدالواسع نے کہا کہ جمعیت علماء اسلام کی مرکزی قیادت کے ہر حکم پر بلوچستان کے کارکنان ہراول دستے کا کردار ادا کرنے سے کبھی دریغ نہیں کریں گے۔ انہوں نے یقین دلایا کہ جماعتی قیادت کی ہدایات پر بھرپور عمل درآمد یقینی بنایا جائے گا۔

ملاقات میں جمعیت علماء اسلام بلوچستان کے صوبائی سیکرٹری جنرل آغا محمود شاہ اور ضلع قلات کے امیر آغا فضل الرحمٰن شاہ بھی موجود تھے۔