پختونخوا ملی عوامی پارٹی کی بلوچستان ایجوکیشن انڈومنٹ فنڈ کی بندش پر تشویش

کوئٹہ (آن لائن) پشتونخوا ملی عوامی پارٹی کے صوبائی سیکرٹریٹ نے بلوچستان ایجوکیشن انڈومنٹ فنڈ (BEEF) کی بندش پر شدید تشویش کا اظہار کیا ہے۔ پارٹی کی جانب سے جاری پریس ریلیز میں حکومت سے مطالبہ کیا گیا ہے کہ وہ اس فیصلے کو واپس لے، ادارے کی خودمختار حیثیت بحال کرے اور تمام ملازمین کے روزگار کو محفوظ بنائے۔

بیان کے مطابق BEEF کا قیام 2014 میں صوبائی کابینہ کی منظوری سے عمل میں لایا گیا تھا۔ یہ ادارہ کمپنیز ایکٹ 2017 کے تحت رجسٹرڈ پبلک سیکٹر کمپنی ہے، جو اپنے بورڈ آف ڈائریکٹرز کے ذریعے انتظامی، مالی اور پالیسی امور چلاتا رہا ہے۔ بیان میں کہا گیا ہے کہ ادارے نے قیام سے اب تک صوبے کے ہزاروں مستحق اور باصلاحیت طلبہ کو تعلیمی وظائف فراہم کر کے اعلیٰ تعلیم کے فروغ میں اہم کردار ادا کیا ہے۔

بیان کے مطابق گزشتہ دنوں ایک نوٹیفکیشن کے ذریعے ادارے کی خودمختار حیثیت ختم کر کے اسے فنانس ڈیپارٹمنٹ کے ماتحت کرنے کا فیصلہ کیا گیا۔ بیان میں موجودہ حکومت کے لیے فارم 47 کی حکومت کا لفظ استعمال کیا گیا ہے۔ پارٹی کے مطابق اس فیصلے سے ملازمین متاثر ہوئے ہیں جبکہ ہزاروں طلبہ کے تعلیمی وظائف کا مستقبل بھی غیر یقینی صورتحال سے دوچار ہو گیا ہے۔

ایک اور اعلامیے میں حکومتِ بلوچستان کے محکمہ سروسز اینڈ جنرل ایڈمنسٹریشن کے ایڈمن ونگ نے بتایا ہے کہ شاعرِ مشرق علامہ محمد اقبال کے یومِ ولادت کے موقع پر 9 نومبر 2026 بروز پیر کو صوبے بھر میں عام تعطیل ہوگی۔ اعلامیے کے مطابق اس روز تمام سرکاری دفاتر اور متعلقہ سرکاری ادارے بند رہیں گے۔