اسحاق ڈار کا پاک چین تعلقات مزید مضبوط بنانے کے عزم کا اعادہ

اسلام آباد: نائب وزیراعظم اور وزیر خارجہ سینیٹر محمد اسحاق ڈار نے کہا ہے کہ پاکستان مسلسل سیاسی روابط اور ادارہ جاتی تعاون کے ذریعے چین کے ساتھ اپنی شراکت داری کو مزید مضبوط بنانے کے لیے پرعزم ہے۔ وہ پیر کو اسلام آباد میں ایک سمپوزیم سے خطاب کر رہے تھے۔

اسحاق ڈار نے دونوں ممالک کے تھنک ٹینکس، جامعات اور دیگر اداروں کے درمیان تبادلے بڑھانے کی ضرورت پر زور دیا، خاص طور پر گورننس، غربت میں کمی اور ترقیاتی منصوبہ بندی کے شعبوں میں۔ ان کے مطابق دوستی کی روایت آگے بڑھانے کے لیے نوجوانوں کو شامل کرنا ضروری ہے۔

انہوں نے کہا کہ دونوں ممالک سفارتی تعلقات کے قیام کی 75ویں سالگرہ منا رہے ہیں اور یہ تعلق باہمی اعتماد، احترام اور تعاون پر مبنی ہمہ موسمی اسٹریٹجک کوآپریٹو پارٹنرشپ کی شکل اختیار کر چکا ہے۔

نائب وزیراعظم کے بقول چین سے تعلقات کی حمایت میں پاکستان کے اندر وسیع سیاسی اتفاقِ رائے اس رشتے کی بڑی طاقت ہے، اور پاک چین دوستی خطے اور اس سے باہر امن و استحکام کا ذریعہ ہے۔

انہوں نے چین کی نمایاں ترقی کو سراہا اور کہا کہ پاکستان معاشی خود انحصاری اور استحکام کی جانب اہم قدم اٹھا چکا ہے اور اب معاشی استحکام کے اگلے مرحلے کی طرف بڑھ رہا ہے۔ ان کے مطابق یہ کامیابیاں گورننس اصلاحات پر مبنی ہیں، جن میں میکرو اکنامک نظم و ضبط، اداروں کی جدید کاری، ڈیجیٹل ٹیکس انتظام اور سادہ ضوابط شامل ہیں۔

سمپوزیم سے چینی کمیونسٹ پارٹی کی مرکزی کمیٹی کے انٹرنیشنل ڈیپارٹمنٹ کے وزیر لیو ہائی شنگ نے بھی خطاب کیا۔