چینی کمیونسٹ پارٹی کے وزیر لیو ہائیشنگ کی وزیراعظم اور فیلڈ مارشل عاصم منیر سے ملاقاتیں

اسلام آباد: چینی کمیونسٹ پارٹی کی مرکزی کمیٹی کے بین الاقوامی شعبے (آئی ڈی سی پی سی) کے وزیر لیو ہائیشنگ نے پیر کو وزیراعظم شہباز شریف سے وزیراعظم ہاؤس میں ملاقات کی۔ ملاقات میں دوطرفہ تعلقات کے ساتھ علاقائی اور عالمی صورتحال پر بات ہوئی۔

وزیراعظم آفس کے بیان کے مطابق لیو ہائیشنگ نے اعلیٰ سطحی رابطوں اور جماعتوں کے درمیان تعاون کے تسلسل کو سراہا اور کہا کہ ان سے دونوں ممالک کی دیرینہ دوستی مزید مضبوط ہوگی۔ انہوں نے چینی قیادت کی نیک تمنائیں پہنچائیں اور پاکستان کے ساتھ دوستی کو مزید گہرا کرنے کے بیجنگ کے عزم کا اعادہ کیا۔

شہباز شریف نے کہا کہ پاکستان اور چین کے درمیان ہمہ موسمی اسٹریٹجک تعاون پر مبنی مضبوط اور آزمودہ شراکت داری ہے، جس کی بنیاد باہمی اعتماد، احترام اور عوامی سطح کے گہرے رشتوں پر ہے۔ انہوں نے سیاسی قیادت کے درمیان ادارہ جاتی روابط بڑھانے میں آئی ڈی سی پی سی کے کردار کی تعریف کی۔

وزیراعظم نے تجارت، سرمایہ کاری، روابط، انفراسٹرکچر کی ترقی، انفارمیشن ٹیکنالوجی اور زرعی جدت کاری میں تعاون بڑھانے پر مشترکہ توجہ کا ذکر کیا۔ بعد ازاں انہوں نے چینی مہمان اور وفد کے اعزاز میں عشائیہ دیا۔

اس سے قبل لیو ہائیشنگ نے جی ایچ کیو راولپنڈی میں چیف آف ڈیفنس فورسز اور آرمی چیف فیلڈ مارشل سید عاصم منیر سے ملاقات کی۔ آئی ایس پی آر کے مطابق ملاقات میں باہمی دلچسپی کے امور، علاقائی و عالمی سلامتی کی بدلتی صورتحال اور دوطرفہ تعلقات پر تبادلہ خیال ہوا۔ دونوں نے ہمہ موسمی اسٹریٹجک تعاون پر مبنی شراکت داری کو مزید مضبوط بنانے کا عزم ظاہر کیا۔

آئی ایس پی آر کے مطابق فیلڈ مارشل عاصم منیر نے دونوں ملکوں کے تاریخی تعلقات کا ذکر کیا اور اعلیٰ سطحی روابط، مضبوط ادارہ جاتی تعلقات اور مشترکہ مفاد کے شعبوں میں تعاون بڑھانے پر زور دیا۔ چینی مہمان نے علاقائی امن و استحکام میں پاکستان کے کردار کو سراہا اور اسٹریٹجک شراکت داری کو آگے بڑھانے پر اعتماد کا اظہار کیا۔