قلعہ عبداللہ: ڈپٹی کمشنر منور حسین مگسی کا یومِ اقبال پر پیغام، نوجوانوں کو افکارِ اقبال کی دعوت

قلعہ عبداللہ: علامہ اقبال کا پیغامِ خودی، اتحاد اور خوداعتمادی آج بھی ہماری قومی رہنمائی کا سرچشمہ ہے، نوجوان نسل اقبال کے افکار کو اپنا شعار بنائے۔

ڈپٹی کمشنر قلعہ عبداللہ منور حسین مگسی نے یومِ اقبال کے موقع پر اپنے خصوصی پیغام میں کہا ہے کہ شاعرِ مشرق حضرت علامہ محمد اقبال کی شخصیت، فکر اور شاعری ہماری قومی تاریخ کا عظیم سرمایہ ہیں۔ انہوں نے اپنی شاعری اور فکری بصیرت کے ذریعے برصغیر کے مسلمانوں میں آزادی، خودی، خودداری اور قومی تشخص کا شعور اجاگر کیا اور ایک آزاد وطن کے تصور کو فکری بنیاد فراہم کی۔

انہوں نے کہا کہ علامہ اقبال کا فلسفہ خودی انسان کو اپنی پہچان، صلاحیتوں اور مقصدِ حیات کا ادراک کرنے کے ساتھ ساتھ بلند حوصلے، مستقل مزاجی اور عملی جدوجہد کی ترغیب دیتا ہے۔ ان کی تعلیمات آج بھی بالخصوص نوجوان نسل کے لیے رہنمائی کا بہترین ذریعہ ہیں، جو انہیں علم و شعور، کردار سازی، محنت اور قومی خدمت کی جانب راغب کرتی ہیں۔

ڈپٹی کمشنر نے کہا کہ یومِ اقبال منانے کا حقیقی مقصد صرف تقریبات کا انعقاد نہیں بلکہ ان کے افکار و تعلیمات کو سمجھنا اور اپنی انفرادی و اجتماعی زندگی میں اپنانا ہے۔ ہمیں چاہیے کہ ہم اقبال کے پیغامِ اتحاد، ایمان، خوداعتمادی اور عمل کو اپنا کر معاشرے میں مثبت تبدیلی، بھائی چارے، برداشت اور قومی یکجہتی کو فروغ دیں۔

انہوں نے مزید کہا کہ پاکستان کی ترقی، استحکام اور خوشحالی کے لیے تعلیم یافتہ، باشعور، باصلاحیت اور ذمہ دار نوجوان نسل بنیادی اہمیت رکھتی ہے۔ ضرورت اس امر کی ہے کہ ہم علامہ اقبال کے خوابوں کے مطابق ایک متحد، مضبوط، پُرامن اور ترقی یافتہ پاکستان کی تعمیر کے لیے انفرادی و اجتماعی سطح پر اپنی ذمہ داریاں احسن انداز میں ادا کریں۔