گوادر: ماڈل ہائی اسکول میں یومِ اقبال کی تقریب، تقریری مقابلے کے فاتح طلبہ کو انعامات

گوادر: شاعرِ مشرق، مفکرِ پاکستان اور عظیم فلسفی علامہ ڈاکٹر محمد اقبال کے یومِ ولادت کے موقع پر گورنمنٹ بوائز ماڈل ہائی اسکول گوادر میں پروقار تقریب منعقد ہوئی، جس میں طلبہ اور اساتذہ نے شرکت کی۔

تقریب کا آغاز تلاوتِ کلامِ پاک سے ہوا، جبکہ نظامت کے فرائض مولانا رحمدل نے انجام دیے۔

اس موقع پر طلبہ اور اسکول کے پرنسپل عبدالمجید کے۔ بی۔ بلوچ نے علامہ اقبال کی ہمہ جہت شخصیت، فکر و فلسفے، فنِ شاعری، ادبی و علمی خدمات اور قومی و ملی افکار پر اظہارِ خیال کیا۔

مقررین نے کہا کہ علامہ اقبال کی شاعری محض الفاظ کا مجموعہ نہیں بلکہ ایک زندہ فکری تحریک ہے، جو نوجوان نسل میں خودی، خودداری، خود اعتمادی، بلند نظری، عمل پیہم اور حصولِ علم کا جذبہ پیدا کرتی ہے۔

ان کا فلسفہ خودی انسان کو اپنی صلاحیتوں کو پہچاننے، بلند مقاصد متعین کرنے اور مسلسل جدوجہد کے ذریعے کامیابی حاصل کرنے کا درس دیتا ہے۔ اقبال نے اپنی شاعری کے ذریعے نوجوانوں کو شاہین کی بلند پروازی، حوصلے، آزادیِ فکر اور کردار کی بلندی کا پیغام دیا، جو آج بھی قومی تعمیر و ترقی کے لیے مشعلِ راہ ہے۔

تقریری مقابلے کے نتائج

منعقدہ تقریری مقابلے میں طلبہ نے علامہ اقبال کی فکر، شاعری اور فلسفہ خودی کے مختلف پہلوؤں پر اظہارِ خیال کیا۔ مقابلے میں مدثر عبدالغفور مہر نے پہلی، خلیل علی نے دوسری جبکہ ثالث اکرم نے تیسری پوزیشن حاصل کی۔

تقریب کے اختتام پر پرنسپل عبدالمجید کے۔ بی۔ بلوچ، وائس پرنسپل خالد کریم اور دیگر اساتذہ نے نمایاں کارکردگی کا مظاہرہ کرنے والے طلبہ میں انعامات تقسیم کیے۔

تصویر: بشکریہ ڈی جی پی آر بلوچستان