نو مئی کیس کے قیدی پی ٹی آئی رہنماؤں کا قیادت کو اتحاد اور صبر کا مشورہ

لاہور: نو مئی کے مقدمات میں کوٹ لکھپت جیل میں قید تحریک انصاف کے رہنماؤں نے پارٹی کے چیئرمین بیرسٹر گوہر، سیکرٹری سلمان اکرم راجہ اور دیگر قیادت کو خط لکھ کر اتحاد کا مظاہرہ کرنے کا مطالبہ کیا ہے۔

رہنماؤں نے کہا ہے کہ پارٹی قیادت بردباری اور صبر کا مظاہرہ کرے۔

شاہ محمود قریشی، ڈاکٹر یاسمین راشد، عمر سرفراز چیمہ، اعجاز چوہدری اور میاں محمودالرشید نے رانا مدثر ایڈووکیٹ کے توسط سے بھجوائے گئے خط میں کہا ہے کہ اس وقت پارٹی مشکلات سے دوچار ہے، اس لیے وہ پی ٹی آئی کی موجودہ قیادت سے مکمل اظہار یکجہتی کرتے ہیں۔

خط میں کہا گیا ہے کہ افواہوں اور خبروں کی بنیاد پر ردعمل نہ دیا جائے۔ رہنما میڈیا پر ذاتی رائے کے بجائے جماعت کی پالیسی کے مطابق بیان دیں۔

خط کے مطابق یہ وقت استعفے دینے اور مانگنے کا نہیں، اتحاد کا ہے۔ بانی پی ٹی آئی تین سال سے قید ہیں۔

رہنماؤں نے کہا کہ شاہ محمود قریشی کی رہائی کو اولین ترجیح دی جائے۔