ایران: مجلسِ خبرگانِ رہبری کا این پی ٹی سے دستبرداری اور دفاعی نظریے پر نظرِ ثانی کا مطالبہ

تہران: ایران میں رہبرِ اعلیٰ کے انتخاب اور ان کی سرگرمیوں پر نظر رکھنے والی کونسل مجلسِ خبرگانِ رہبری نے ایک بیان میں جوہری ہتھیاروں کے عدم پھیلاؤ کے معاہدے (این پی ٹی) سے دستبردار ہونے اور ایران کے دفاعی نظریے پر نظرِ ثانی پر غور کرنے کا مطالبہ کیا ہے۔

کونسل کی جانب سے جاری بیان میں کہا گیا کہ این پی ٹی سے علیحدگی اور دشمن کو باز رکھنے کے لیے ضروری دفاعی قوت پیدا کرنے کے لیے دفاعی نظریے میں تبدیلی پر غور کرنا اب ایک ناگزیر ضرورت اور عوامی و قومی مطالبہ بن چکا ہے۔

خبردار اور نئے مطالبات

مجلسِ خبرگانِ رہبری نے خبردار کیا کہ اگر ایران پر دوبارہ حملہ کیا گیا تو ملک کی مسلح افواج فوری اور مؤثر جواب دیں گی، جس پر کوئی جغرافیائی پابندی نہیں ہوگی۔

ادارے نے مختلف اداروں اور قوتوں کی شمولیت کے ساتھ، اور رہبرِ اعلیٰ کے دفتر کی نگرانی میں، ایک وار اکانومی ہیڈکوارٹر قائم کرنے کا مطالبہ بھی کیا ہے۔ اس کے علاوہ دشمن کی ثقافتی یلغار کا مقابلہ کرنے پر زور دیا گیا ہے۔

حکام کے بیانات

حالیہ ہفتوں میں کئی ایرانی حکام اور اراکینِ پارلیمان ملک کی جوہری پالیسی پر نظرِ ثانی کا مطالبہ کر چکے ہیں، جبکہ بعض نے کھل کر ایران کے لیے جوہری ہتھیار حاصل کرنے کی ضرورت کا اظہار بھی کیا ہے۔

ان میں تہران کے قائم مقام امامِ جمعہ محمد جواد حاج علی اکبری بھی شامل ہیں، جنھوں نے 28 نومبر کو جوہری نظریے میں تبدیلی کو قومی مطالبہ قرار دیا تھا۔ پارلیمان کے پریزیڈیم کے رکن احمد نادری نے ایٹم بم بنانے کا مطالبہ کیا تھا۔

تاہم ایران کی سپریم نیشنل سیکیورٹی کونسل کے سیکریٹری محسن رضائی نے 29 نومبر کو کہا تھا کہ حکومت جوہری نظریے میں تبدیلی پر غور کر رہی ہے، لیکن اس حوالے سے ابھی کوئی باضابطہ فیصلہ نہیں کیا گیا۔

دوسری جانب ایرانی وزارتِ خارجہ کے ترجمان اسماعیل بقائی نے 9 نومبر کو زور دیا تھا کہ تہران اب بھی این پی ٹی کی پابندیوں اور ذمہ داریوں کا پابند ہے۔