پاکستان اور روس کے درمیان 10 سے زائد معاہدوں پر دستخط کی تیاری آخری مراحل میں

اسلام آباد: پاکستان اور روس کے درمیان اقتصادی، صنعتی اور تکنیکی تعاون کو وسعت دینے کے لیے اہم پیش رفت سامنے آئی ہے۔

روس کے وزیر توانائی سرگئی تسویلیف کی زیر صدارت روس پاکستان بین الحکومتی کمیشن کے روسی وفد کا اجلاس ہوا، جس میں دونوں ممالک کے درمیان مختلف شعبوں میں تعاون کے نئے امکانات اور مشترکہ منصوبوں کی تیاریوں کا جائزہ لیا گیا۔

روس پاکستان بین الحکومتی کمیشن کا 11واں اجلاس 25 نومبر 2026 کو ماسکو میں ہوگا۔ پاکستان کے وفاقی وزیر توانائی سردار اویس احمد خان لغاری اور روسی وزیر توانائی سرگئی تسویلیف کمیشن کے مشترکہ چیئرمین ہیں۔

روسی وزارت توانائی کے مطابق دونوں ممالک کے درمیان مختلف شعبوں میں تعاون کے 10 سے زائد معاہدوں اور دستاویزات پر دستخط کی تیاری آخری مراحل میں داخل ہو گئی ہے۔ روسی وزیر توانائی نے جاری منصوبوں پر عملی پیش رفت یقینی بنانے اور تعاون کے لیے ٹھوس تجاویز تیار کرنے پر زور دیا ہے۔

توانائی اور صنعت

اجلاس میں پاکستان کو روسی توانائی وسائل کی فراہمی، توانائی ذخیرہ کرنے کے جدید نظام، توانائی کی استعداد کار میں بہتری اور پن بجلی کے منصوبوں پر تفصیلی تبادلہ خیال کیا گیا۔ پاکستان میں نئے پن بجلی گھر تعمیر کرنے اور پہلے سے موجود پن بجلی منصوبوں کو جدید ٹیکنالوجی سے ہم آہنگ کرنے میں روسی تعاون کے امکانات کا بھی جائزہ لیا گیا۔

پاکستان کے توانائی کے بنیادی ڈھانچے کو سائبر حملوں اور دیگر ڈیجیٹل خطرات سے محفوظ بنانے کے لیے تکنیکی تعاون پر بھی بات چیت ہوئی۔ صنعتی تعاون کے تحت کراچی اسٹیل ملز کی بحالی اور اسے جدید خطوط پر استوار کرنے کے امکانات بھی زیر غور آئے۔

دونوں ممالک کے درمیان صحت اور ادویہ سازی کے شعبے میں تعاون بڑھانے، بالخصوص روسی انسولین کی پاکستان میں مقامی سطح پر تیاری کے منصوبے شروع کرنے کے امکانات کا جائزہ لیا گیا۔

اجلاس میں بحری جہاز رانی کے شعبے میں تعاون بڑھانے اور انٹرنیشنل نارتھ ساؤتھ ٹرانسپورٹ کوریڈور کے ذریعے تجارتی روابط مزید مستحکم کرنے پر اتفاق کیا گیا۔ یوریشین اکنامک یونین اور پاکستان کے درمیان آزاد تجارتی معاہدے کے امکانات کا جائزہ لینے کے لیے 2026 میں تحقیقی گروپ قائم کرنے کا معاملہ بھی زیر بحث آیا۔

زراعت، تعلیم اور آفات

پاکستان اور روس کے درمیان زرعی شعبے کی دوطرفہ تجارت میں 17 فیصد اضافہ ریکارڈ کیا گیا ہے، جبکہ روس کی جانب سے پاکستان کو تیار زرعی مصنوعات کی برآمدات میں بھی مسلسل اضافہ ہو رہا ہے۔ اجلاس میں روسی معدنی کھادوں اور ویٹرنری ویکسینز کی فراہمی کے امکانات پر غور کیا گیا۔

روسی تعلیمی اداروں میں پاکستانی طلبہ کی تعداد بڑھ کر تقریباً 1400 ہو گئی ہے۔ تعلیمی سال 2025-26 کے دوران روسی جامعات میں زیر تعلیم پاکستانی طلبہ کی تعداد 2023 کے مقابلے میں دوگنا ہو گئی۔ اسلام آباد میں روسی زبان کی تعلیم کے فروغ کے لیے اوپن ایجوکیشن سینٹر بھی قائم کیا گیا ہے۔

پاکستان اور روس نے قدرتی آفات سے نمٹنے، ہنگامی حالات میں امدادی کارروائیوں اور ریسکیو کے شعبے میں باہمی تعاون جاری رکھنے پر اتفاق کیا ہے۔ جنوری 2026 میں روسی ایمرجنسی ماہرین نے پاکستان میں قدرتی آفات سے نمٹنے کے حوالے سے مشترکہ مشقوں میں حصہ لیا تھا۔

2005 کے تباہ کن زلزلے کے بعد بھی روسی ریسکیو ٹیموں نے پاکستان میں امدادی سرگرمیوں میں اہم کردار ادا کیا تھا، جسے دونوں ممالک کے درمیان انسانی ہمدردی اور تعاون کی ایک اہم مثال قرار دیا جاتا ہے۔

ماسکو میں 25 نومبر کو ہونے والے 11ویں اجلاس میں اقتصادی، صنعتی، تجارتی، توانائی، زرعی، تعلیمی اور سائنسی تعاون کے نئے شعبوں کا جائزہ لیا جائے گا۔ اجلاس میں 10 سے زائد مجوزہ معاہدوں اور دستاویزات کو حتمی شکل دینے کے ساتھ مشترکہ منصوبوں کو آگے بڑھانے کے لائحہ عمل پر بھی غور متوقع ہے۔