شہدائے جموں کی قربانیاں ناقابلِ فراموش ہیں: اسپیکر ایاز صادق

اسلام آباد: قومی اسمبلی کے اسپیکر سردار ایاز صادق نے یومِ شہدائے جموں کے موقع پر 6 نومبر 1947ء کے سانحے کے شہداء کو خراجِ عقیدت پیش کیا۔ انہوں نے کہا کہ شہدائے جموں کی لازوال قربانیاں کشمیری عوام کی جدوجہدِ آزادی کی تاریخ کا ناقابلِ فراموش باب ہیں۔

انہوں نے جموں میں مسلمانوں کے بڑے پیمانے پر قتلِ عام اور لاکھوں افراد کی جبری ہجرت کو انسانی تاریخ کا دردناک سانحہ قرار دیا۔ ان کے مطابق کشمیری عوام آج بھی اپنے بنیادی حقوق، آزادی اور حقِ خودارادیت کے حصول کے لیے جدوجہد کر رہے ہیں۔

ایاز صادق نے عالمی برادری سے مطالبہ کیا کہ وہ مقبوضہ جموں و کشمیر میں انسانی حقوق کی خلاف ورزیوں کا مؤثر نوٹس لے اور اقوام متحدہ کی سلامتی کونسل کی قراردادوں کے مطابق مسئلہ کشمیر کے منصفانہ اور پرامن حل کے لیے کردار ادا کرے۔ ان کے بقول سانحہ جموں محض ایک تاریخی واقعہ نہیں، بلکہ کشمیری عوام کے خلاف مظالم اور ان کی شناخت و آبادیاتی حیثیت بدلنے کی کوششوں کی دردناک یاد دہانی ہے۔

ان کے مطابق بھارت کا 5 اگست 2019ء کا یکطرفہ اور غیر قانونی اقدام مقبوضہ علاقے کی خصوصی حیثیت ختم کرنے اور آبادیاتی شناخت تبدیل کرنے کی کوششوں کا حصہ ہے، جس سے کشمیری عوام کے بنیادی حقوق اور شناخت شدید متاثر ہوئی ہے۔ انہوں نے غیر قانونی حراستوں، سیاسی قیادت پر پابندیوں اور آزادی اظہار کو محدود کرنے کے اقدامات پر بھی عالمی توجہ مبذول کرائی۔

اسپیکر قومی اسمبلی نے کہا کہ مسئلہ کشمیر کا منصفانہ اور پرامن حل جنوبی ایشیا میں پائیدار امن، استحکام اور خوشحالی کے لیے ناگزیر ہے۔ انہوں نے اعادہ کیا کہ پاکستان اپنے کشمیری بھائیوں اور بہنوں کی اخلاقی، سیاسی اور سفارتی حمایت جاری رکھے گا۔

آخر میں ایاز صادق نے شہدائے جموں کے لیے جنت الفردوس میں اعلیٰ مقام کی دعا کی اور کشمیری عوام کے لیے آزادی، امن اور خوشحالی کی تمنا کی۔