عمر خالد اور شرجیل امام کو بہت پہلے ضمانت مل جانی چاہیے تھی: سابق جج دھولیا

نئی دہلی: بھارتی سپریم کورٹ کے سابق جج جسٹس سدھانشو دھولیا نے کہا ہے کہ طلبہ رہنماؤں عمر خالد اور شرجیل امام کو بہت پہلے ضمانت مل جانی چاہیے تھی۔

کشمیر میڈیا سروس کے مطابق جسٹس دھولیا نے نئی دہلی میں تیسرے سر سید لیکچر سے خطاب کرتے ہوئے بھارتی آئین کے تحت انصاف کے تصور پر گفتگو کی اور دونوں رہنماؤں کی طویل نظربندی پر تشویش ظاہر کی۔

جسٹس دھولیا نے کہا کہ میری ذاتی رائے میں عمر خالد اور شرجیل امام کو بہت پہلے ضمانت مل جانی چاہیے تھی۔

عمر خالد اور شرجیل امام 2020 کے دہلی فسادات سے متعلق مقدمے کے سلسلے میں نظربند ہیں۔ ان کے خلاف غیر قانونی سرگرمیوں کی روک تھام کے کالے قانون (یو اے پی اے) کے تحت الزامات عائد کیے گئے ہیں۔ دونوں رہنماؤں نے اپنے خلاف عائد الزامات کی تردید کی ہے۔

جسٹس دھولیا کا یہ بیان مقدمے کی سماعت سے پہلے طویل نظربندی، تیز رفتار ٹرائل کے حق اور قومی سلامتی کے قوانین و شخصی آزادی کے درمیان توازن پر جاری وسیع تر بحث کے دوران سامنے آیا ہے۔

ضمانت ملنے سے کسی ملزم کا قصوروار یا بے قصور ہونا طے نہیں ہوتا۔ اس کا تعین قانونی کارروائی کے ذریعے ہونا چاہیے۔

جسٹس دھولیا کے بیان کو یو اے پی اے کے تحت مقدمات میں ضمانت دینے میں تاخیر پر عدالتی نظام کے اندر سے اٹھنے والے سوالات کے طور پر دیکھا جا رہا ہے۔