پاکستان کی باؤلنگ اور فیلڈنگ شاندار رہی، جلد وکٹیں گنوانے سے نقصان ہوا: ہیری بروک

راولپنڈی: انگلینڈ کرکٹ ٹیم کے کپتان ہیری بروک نے کہا ہے کہ ہم میچ کے نتیجے سے خوش ہیں، تاہم ابتدائی شراکت کے بعد مڈل آرڈر میں بہتر شراکت داری قائم نہ کر سکے۔

میچ کے بعد پریس کانفرنس میں انہوں نے پاکستان کی کارکردگی کا اعتراف کیا۔ ان کا کہنا تھا کہ پاکستان نے بہترین کرکٹ کھیلی اور اس کی باؤلنگ کے ساتھ فیلڈنگ بھی شاندار رہی۔

انگلش کپتان نے کہا کہ پاکستان کے نوجوان باؤلر عرفات نے بہترین باؤلنگ کی۔ ان کے مطابق انگلینڈ کو آئندہ میچوں کے لیے اس قسم کے دباؤ سے نمٹنے کی بہتر تیاری کرنا ہوگی۔

ایک سوال کے جواب میں انہوں نے کہا کہ ہم پاکستان کے کھیل سے حیران نہیں ہوئے کیونکہ وہ ایک بہترین ٹیم ہے۔ ان کا کہنا تھا کہ آج کا میچ یقیناً سنسنی خیز اور حیران کن تھا، لیکن پاکستان کا مجموعی کھیل بہترین رہا۔

ہیری بروک نے کہا کہ وہ نہیں سمجھتے کہ انہوں نے پہلی اننگز میں میچ گنوایا۔ ان کے بقول انگلش باؤلرز نے میچ کے پہلے ہاف میں بہترین باؤلنگ کی، لیکن بعد میں ٹیم نے مسلسل اور جلد وکٹیں گنوائیں، جو کھیل کا حصہ ہے۔

انہوں نے کہا کہ اوپنرز نے اچھا آغاز فراہم کیا۔ انہیں امید ہے کہ ٹیم آئندہ میچوں میں، خصوصاً سری لنکا کے خلاف مقابلے میں، مزید بہتر کھیل پیش کرے گی۔