بارکھان: ضلعی ناظم صحت ڈاکٹر محمد حسن ڈومکی کا ڈی ایچ کیو ہسپتال اور ایم سی ایچ سنٹر کا اچانک دورہ

بارکھان: ضلعی ناظمِ صحت ڈاکٹر محمد حسن ڈومکی نے ڈسٹرکٹ ہیڈکوارٹر (DHQ) ہسپتال بارکھان اور ایم سی ایچ (MCH) سنٹر کا مارننگ شفٹ کے دوران اچانک دورہ کیا۔ اس موقع پر انہوں نے ہسپتال کے مختلف شعبہ جات کا تفصیلی معائنہ کیا اور مریضوں کو فراہم کی جانے والی طبی سہولیات کا جائزہ لیا۔

دورے کے دوران ضلعی ناظمِ صحت نے ڈینٹل وارڈ، ڈائلیسس یونٹ، ایمرجنسی اور ایم سی ایچ سنٹر کا خصوصی معائنہ کیا۔ انہوں نے ہسپتال میں ادویات کے اسٹاک، مریضوں کی دیکھ بھال کے معیار، عملے کی حاضری اور ڈیوٹی روسٹر کے انتظامات کو چیک کیا۔

ہدایات

ڈاکٹر محمد حسن ڈومکی نے متعلقہ عملے کو سخت ہدایات جاری کرتے ہوئے کہا کہ ہسپتال کے تمام دفتری و طبی ریکارڈز کو روزانہ کی بنیاد پر باقاعدگی سے اپ ڈیٹ رکھا جائے اور صفائی ستھرائی سمیت مریضوں کو بروقت اور معیاری علاج کی فراہمی میں کوئی کسر نہ چھوڑی جائے۔

انہوں نے واضح کیا کہ اس اچانک دورے کا بنیادی مقصد ہسپتال کی مجموعی کارکردگی کو بہتر بنانا، عملے کی حاضری کو سو فیصد یقینی بنانا اور ادویات کے نظام کو شفاف بنا کر عوام کو دہلیز پر صحت کی بہترین سہولیات فراہم کرنا ہے۔

ان کا کہنا تھا کہ فرائض میں غفلت کسی صورت برداشت نہیں کی جائے گی۔