گوادر میں پی پی ایچ آئی کا ماہانہ جائزہ اجلاس، بنیادی مراکز صحت کی کارکردگی اور ادویات کی دستیابی کا جائزہ

گوادر: ضلعی آفیسر صحت ڈاکٹر یاسر طاہر اور پی پی ایچ آئی کے ڈسٹرکٹ منیجر ڈاکٹر منیر احمد بلوچ کی زیرِ صدارت پی پی ایچ آئی کا ماہانہ جائزہ اجلاس منعقد ہوا، جس میں تمام بنیادی مراکزِ صحت کے انچارجز نے شرکت کی۔

اجلاس میں ضلع گوادر کے بنیادی مراکزِ صحت کی کارکردگی، طبی سہولیات، ادویات کی دستیابی، اسٹاف کی حاضری اور عوام کو دی جانے والی صحت کی خدمات کا تفصیلی جائزہ لیا گیا۔ ماہانہ کارکردگی رپورٹ کا جائزہ لیتے ہوئے صحتِ عامہ کی سہولیات کو مزید مؤثر بنانے اور بالخصوص دور دراز اور پسماندہ علاقوں کے عوام کو بروقت اور معیاری طبی سہولیات کی فراہمی یقینی بنانے پر زور دیا گیا۔

اجلاس میں ہدایت کی گئی کہ بنیادی مراکزِ صحت میں طبی عملے کی حاضری، ادویات کی دستیابی اور مریضوں کو ضروری طبی خدمات کی فراہمی میں کسی قسم کی غفلت برداشت نہیں کی جائے گی، اور مراکزِ صحت کی کارکردگی کو مسلسل مانیٹر کیا جائے۔

ڈاکٹر یاسر طاہر نے کہا کہ حکومت بلوچستان کی صحتِ عامہ کی پالیسی کے تحت شہریوں کو ان کی دہلیز پر بنیادی اور معیاری صحت کی سہولیات کی فراہمی اولین ترجیح ہے۔ انہوں نے متعلقہ حکام پر زور دیا کہ دور دراز علاقوں میں صحت کی سہولیات کی دستیابی، مؤثر نگرانی اور عوامی شکایات کا بروقت ازالہ یقینی بنایا جائے۔

اجلاس میں پی پی ایچ آئی کے تحت صحتِ عامہ کی خدمات میں مزید بہتری، بنیادی مراکزِ صحت کی کارکردگی بڑھانے اور عوام کو بہتر طبی سہولیات کی فراہمی کے لیے مختلف اقدامات پر بھی غور کیا گیا۔

تصویر: بشکریہ ڈی جی پی آر بلوچستان