کوئٹہ: یومِ سیاہ پر کشمیری عوام سے یکجہتی کے لیے شہر میں سائن بورڈز آویزاں

کوئٹہ: ضلعی انتظامیہ کوئٹہ کی جانب سے 27 اکتوبر یومِ سیاہ کے موقع پر کشمیری عوام سے اظہارِ یکجہتی اور بھارتی مظالم کے خلاف عالمی ضمیر کو جھنجھوڑنے کے لیے شہر کے مختلف مقامات پر آگاہی پر مبنی سائن بورڈز آویزاں کیے گئے ہیں۔ ان سائن بورڈز کے ذریعے مقبوضہ جموں و کشمیر کے عوام کے ساتھ یکجہتی کا اظہار کرتے ہوئے ان کے حقِ خودارادیت کی حمایت اور ان پر ڈھائے جانے والے مظالم کی مذمت کی گئی ہے۔

اس اقدام کا مقصد 27 اکتوبر کی تاریخی اہمیت کو اجاگر کرنا، کشمیری عوام کی جدوجہد کو خراجِ تحسین پیش کرنا اور عوام میں مسئلہ کشمیر کے حوالے سے شعور و آگاہی پیدا کرنا ہے۔ سائن بورڈز پر درج پیغام “ظلم کے یہ سائے لمبے ہیں، مگر دائمی نہیں” مظلوم کشمیری عوام کے عزم، حوصلے اور آزادی کی امید کی عکاسی کرتا ہے۔

یومِ سیاہ کی اہمیت

27 اکتوبر 1947 کو بھارتی فوج کی جموں و کشمیر میں آمد کو پاکستان میں یومِ سیاہ کے طور پر یاد کیا جاتا ہے۔ اس دن کشمیری عوام کے ساتھ اظہارِ یکجہتی کرتے ہوئے مقبوضہ جموں و کشمیر میں انسانی حقوق کی خلاف ورزیوں، پابندیوں اور دیگر مظالم کے خلاف آواز بلند کی جاتی ہے۔ یہ دن کشمیری عوام کی قربانیوں کو یاد کرنے اور عالمی برادری کی توجہ مسئلہ کشمیر کے منصفانہ حل کی جانب مبذول کرانے کا اہم موقع ہے۔

ضلعی انتظامیہ کوئٹہ کی جانب سے شہر کے مختلف نمایاں مقامات پر سائن بورڈز کی تنصیب اسی سلسلے کی ایک کڑی ہے، جس کا مقصد عوام کو اس دن کی اہمیت سے آگاہ کرنا اور کشمیری عوام کے ساتھ قومی یکجہتی کے پیغام کو عام کرنا ہے۔

پیغام میں اس عزم کا اظہار کیا گیا ہے کہ کشمیری عوام کی جدوجہد، قربانیوں اور حقِ خودارادیت کی حمایت جاری رہے گی۔ ظلم و جبر کے باوجود امید، حوصلے اور انصاف کی جدوجہد کو دبایا نہیں جا سکتا، اور کشمیری عوام کی امنگوں کے مطابق مسئلہ کشمیر کا منصفانہ حل خطے میں پائیدار امن کے لیے ناگزیر ہے۔