ٹرمپ کا اوباما پر ایران کو اربوں ڈالر دینے اور جوہری ہتھیار کی راہ ہموار کرنے کا الزام

واشنگٹن: امریکی صدر ڈونلڈ ٹرمپ نے سابق صدر اوباما کی تنقید پر ردعمل دیتے ہوئے کہا ہے کہ اوباما انتہائی نااہل صدر تھے۔ ان کے مطابق اوباما نے ایران کو اربوں ڈالر دیے اور جوہری ہتھیار بنانے کی راہ فراہم کی۔

غیرملکی خبررساں ادارے کے مطابق صدر ٹرمپ نے کہا کہ اوباما نے بدعنوان ہیلری کلنٹن اور کمیلا ہیرس کے لیے بھی انتخابی مہم چلائی، جو دونوں بری طرح ہار گئی تھیں۔

امریکی صدر نے کہا کہ مشی گن کے لوگ ایسے متکبر، کھلی سرحدوں کے حامی اور جعلی ڈاکٹر کے حامی نہیں، اور انہوں نے مشی گن میں بھاری اکثریت سے کامیابی حاصل کی۔ ان کا کہنا تھا کہ انہوں نے مشی گن میں آٹو انڈسٹری بحال کی، ایئر فورس کا اڈہ واپس لایا اور پہلے سے زیادہ ملازمتیں پیدا کیں۔ انہوں نے مشی گن کے لوگوں سے مائیک راجرز کو ووٹ دینے کی اپیل کی۔

ادھر اوباما نے ٹرمپ کو تنقید کا نشانہ بناتے ہوئے کہا کہ جب وہ صدر تھے تو ایران کے پاس جوہری ہتھیار موجود نہیں تھے، کیونکہ ان کی انتظامیہ نے سفارت کاری کے ذریعے ایسا معاہدہ کیا تھا جس نے تہران کو جوہری ہتھیار بنانے سے روک رکھا تھا۔

اوباما نے یہ بیان امریکی ریاست اوہائیو میں ڈیموکریٹس کی انتخابی مہم کے دوران دیا۔ ان کا کہنا تھا کہ ایران کے خلاف موجودہ جنگ کا بنیادی جواز یہ بتایا گیا تھا کہ تہران کو جوہری ہتھیار حاصل کرنے سے روکا جائے، تاہم ان کے مطابق یہ مسئلہ 2015 کے جوہری معاہدے کے ذریعے پہلے ہی حل ہو چکا تھا۔

اوباما نے کہا کہ ان کی انتظامیہ کو ایران کے جوہری پروگرام پر قابو پانے کے لیے میزائل داغنے کے بجائے سفارت کاری کا راستہ اختیار کرنا پڑا۔ انہوں نے یاد دلایا کہ ٹرمپ نے 2018 میں اس معاہدے سے امریکا کو نکال لیا تھا۔