او آئی سی سیکرٹری جنرل کی مکہ، مدینہ اور سعودی شہروں پر حوثی حملوں کی مذمت

جدہ: اسلامی تعاون تنظیم (او آئی سی) کے سیکرٹری جنرل اسماعیل بن شیخ احمد نے مکہ مکرمہ، مدینہ منورہ، طائف، جدہ اور دیگر مقامات پر حوثیوں کے مبینہ حملوں کی شدید مذمت کی ہے۔ انہوں نے ان حملوں کو ناقابلِ قبول قرار دیا۔

انہوں نے اسلامی مقدس مقامات کی بے حرمتی کی بھی مذمت کی اور سعودی عرب کے ساتھ مکمل یکجہتی کا اظہار کیا ہے۔

او آئی سی کے اعلامیے کے مطابق سیکرٹری جنرل نے کہا کہ میدانِ عرفات کے قریب وادی مغمس کو نشانہ بنانا اس امر کی عکاسی کرتا ہے کہ حوثی عناصر مقدس مقامات کے احترام اور عام شہریوں کے تحفظ کو اہمیت نہیں دے رہے۔

اسماعیل بن شیخ احمد نے کہا کہ اسلامی مقدس مقامات پر حملے پوری مسلم امہ کے جذبات پر حملہ ہیں۔ مسلم دنیا کو اس صورتحال میں مضبوط اور ذمہ دارانہ موقف اختیار کرنا ہوگا تاکہ شدت پسند عناصر کی کارروائیوں کا خاتمہ کیا جا سکے۔

انہوں نے عالمی برادری پر زور دیا کہ اسلامی مقدس مقامات پر حملوں کے خلاف فوری اقدامات کیے جائیں اور ان کارروائیوں کے ذمہ داروں کا احتساب یقینی بنایا جائے۔

سیکرٹری جنرل نے مملکت کی سلامتی، خودمختاری اور علاقائی سالمیت کے تحفظ کے لیے کیے جانے والے اقدامات کی مکمل حمایت کا یقین دلایا۔ اعلامیے میں اس عزم کا اعادہ کیا گیا کہ مقدس مقامات کے احترام، شہریوں کے تحفظ اور خطے میں امن و استحکام کے لیے مؤثر اقدامات ناگزیر ہیں۔