موسیٰ خیل میں یومِ سیاہ کشمیر پر ریلی، ڈپٹی کمشنر عبدالرزاق خان خجک کی قیادت

موسیٰ خیل: ملک بھر کی طرح ضلع موسیٰ خیل میں بھی 27 اکتوبر کو “یومِ سیاہ کشمیر” کے موقع پر کشمیری عوام سے یکجہتی کے لیے ایک پروقار اور شاندار ریلی نکالی گئی۔

ریلی کی قیادت ڈپٹی کمشنر موسیٰ خیل عبدالرزاق خان خجک نے کی۔

ریلی میں شرکاء

ریلی میں ایس پی پولیس کلیم اللہ کاکڑ، لائن ڈیپارٹمنٹس کے سربراہان، قبائلی عمائدین، سکول کے طلباء اور مختلف مکاتبِ فکر سے تعلق رکھنے والے شہریوں نے بڑی تعداد میں شرکت کی۔

ریلی کے شرکاء نے بازوؤں پر سیاہ پٹیاں باندھ رکھی تھیں، جبکہ ہاتھوں میں کشمیریوں سے اظہارِ یکجہتی کے بینرز اٹھائے ہوئے تھے اور پاکستان اور آزاد کشمیر کے قومی پرچم لہرا رہے تھے۔

ریلی شہر کی مختلف شاہراہوں سے ہوتی ہوئی ڈسٹرکٹ کمپلیکس موڑ پر اختتام پذیر ہوئی۔ اس موقع پر مقبوضہ کشمیر کے مظلوم اور غیور بھائیوں سے مکمل یکجہتی کے اظہار کے لیے ایک منٹ کی خاموشی اختیار کی گئی۔

ڈپٹی کمشنر کا خطاب

ریلی سے خطاب کرتے ہوئے ڈپٹی کمشنر عبدالرزاق خان خجک نے کہا کہ پاکستان کا ہر شہری اپنے کشمیری بھائیوں کی جدوجہدِ آزادی میں ان کے ساتھ شانہ بشانہ کھڑا ہے۔

اقوامِ متحدہ کی قراردادوں کے مطابق کشمیریوں کو ان کا بنیادی حقِ خودارادیت ملنے تک پاکستان اخلاقی، سیاسی اور سفارتی سطح پر ان کی حمایت جاری رکھے گا۔

ریلی کے اختتام پر مقبوضہ کشمیر کی آزادی، کشمیری شہداء کے درجات کی بلندی، اور ملکِ پاکستان کی سلامتی، بقا اور استحکام کے لیے خصوصی دعا کی گئی۔