ثمرین کور کا ارشدیپ سنگھ کے ساتھ تعلقات پر تنقید کے جواب میں بیان

نئی دہلی: بھارتی اداکارہ اور ماڈل ثمرین کور نے کرکٹر ارشدیپ سنگھ کے ساتھ تعلقات پر ہونے والی تنقید اور سوشل میڈیا ٹرولنگ پر خاموشی توڑ دی۔

27 سالہ ثمرین کور نے انسٹاگرام اسٹوریز پر بیان میں کہا کہ سوشل میڈیا پر خواتین کو ہر صورت تنقید کا سامنا کرنا پڑتا ہے۔ اگر کوئی اپنے تعلقات کو نجی رکھے تو اسے اپنے ساتھی پر فخر نہ کرنے کا طعنہ دیا جاتا ہے، جبکہ محبت کا کھل کر اظہار کرنے پر شہرت حاصل کرنے کی کوشش کا الزام لگایا جاتا ہے۔

اداکارہ نے ان الزامات کو بھی مسترد کیا کہ وہ ارشدیپ سنگھ کی شہرت یا دولت کی وجہ سے ان کے ساتھ تعلقات میں ہیں۔ انہوں نے کہا کہ وہ 17 سال کی عمر سے کام کر رہی ہیں، مالی اور پیشہ ورانہ طور پر خود مختار ہیں اور 20 سے زائد ممالک کا سفر کر چکی ہیں۔

ثمرین کور نے خواتین کی جانب سے خواتین پر تنقید کے رجحان پر افسوس کا اظہار کیا اور کہا کہ غیر ضروری تبصرے، مفروضے اور منفی رویے تھکا دینے والے ہیں۔

انہوں نے واضح کیا کہ وہ اپنے تعلقات میں خوش ہیں اور نفرت انگیز تبصرے کرنے والوں کو بلاک کر دیں گی۔ ان کے مطابق انہیں اپنی زندگی خوشی سے جینے دی جائے۔

ثمرین کی پوسٹ پر ردِعمل دیتے ہوئے بھارتی فاسٹ بولر ارشدیپ سنگھ نے اپنی گرل فرینڈ کی حمایت کی اور سوشل میڈیا صارفین سے تعلقات میں مداخلت نہ کرنے کی اپیل کی۔

ارشدیپ سنگھ نے انسٹاگرام اسٹوری میں لکھا کہ انہیں ثمرین پر فخر ہے اور وہ ایک مضبوط خاتون ہیں۔ انہوں نے تنقید کرنے والوں کو مشورہ دیا کہ دوسروں کی زندگی میں مداخلت کے بجائے اپنی زندگی پر توجہ دیں اور دنیا میں محبت اور مہربانی پھیلائیں۔

ارشدیپ نے ثمرین کی شخصیت کو مخلص، سمجھدار اور محبت سے بھرپور قرار دیا اور ان تمام لوگوں کا شکریہ ادا کیا جو دونوں کے لیے نیک خواہشات رکھتے ہیں۔

واضح رہے کہ ثمرین کور اور ارشدیپ سنگھ کے درمیان تعلقات کی خبریں 2026 کے انڈین پریمیئر لیگ (آئی پی ایل) کے دوران سامنے آئی تھیں، جس کے بعد دونوں کے تعلقات سے متعلق قیاس آرائیاں شروع ہوئیں۔