فضل الرحمان: ملک کسی جرنیل کا نہیں، ہم سب کا ہے، نیا میثاقِ جمہوریت ہونا چاہیے

اسلام آباد: جمعیت علمائے اسلام (ف) کے سربراہ مولانا فضل الرحمان نے قومی اسمبلی میں خطاب کرتے ہوئے کہا کہ ہم آپ کے ہاتھوں مرنے کو تیار ہیں، تاریخ کے ہاتھوں مرنے کو تیار نہیں۔

انہوں نے کہا کہ یہ ملک کسی جرنیل کا نہیں، ہم سب کا ہے۔ پارلیمنٹ عوام کا نمائندہ ادارہ ہے، برداشت کی قوت ختم ہو گئی ہے اور معاملات بگڑتے چلے جا رہے ہیں۔

نیا میثاقِ جمہوریت کی دعوت

مولانا فضل الرحمان نے کہا کہ آئیں ایک میز پر بیٹھیں اور نیا میثاقِ جمہوریت کریں، جس میں حکومت بھی ہو اور اپوزیشن بھی۔

انہوں نے کہا کہ جب لانگ مارچ اسلام آباد کی طرف آ رہا تھا تو پی ٹی آئی کے دوستوں نے ان سے کہا کہ اس میں ان کا کوئی کردار ہونا چاہیے۔ اگلے دن رانا ثناء اللہ ان کے پاس تشریف لائے اور اس موضوع پر تفصیلی بات ہوئی۔

رات کو وزیراعظم کے دفتر سے فون آیا کہ وہ کھانے پر بلانا چاہتے ہیں، جس کی انہوں نے دعوت قبول کی۔ اس کے بعد وزیراعظم نے کہا کہ وہ لانگ مارچ کی کال واپس لیں۔

مولانا فضل الرحمان نے کہا کہ ساڑھے دس بجے اسحاق ڈار کا فون آیا کہ کابینہ نہیں مان رہی۔ ہم نے کوشش کی کہ معاملہ ٹھیک طریقے سے حل ہو، مگر وہاں پر گورنر راج بھی لگایا گیا اور ایمرجنسی بھی۔ حکومت کہتی ہے کہ اس نے آئینی پروسیجر مکمل کیا ہے۔

سربراہ جے یو آئی نے کہا کہ حکومت نے آئین کو غلط استعمال کیا ہے، طاقت کے ذریعے انتقالِ اقتدار کا عمل لایا گیا اور آرٹیکل 2 اے کو نظر انداز کیا گیا۔

انہوں نے سوال کیا کہ کیا بلوچستان میں حالات اس سے خراب نہیں ہیں، جہاں کمشنر بھی اغوا ہو جاتے ہیں۔ انہوں نے کہا کہ سنا ہے خان آف قلات کے صاحبزادے کو بھی اغوا کر لیا گیا ہے۔ کیا وفاق ملک میں امن و امان برقرار رکھنے میں کامیاب ہے؟

انہوں نے کہا کہ ان کی جماعت شہدا کی جماعت ہے، آپ مجھے طعنہ دیتے ہیں، ہماری قربانیوں کا مذاق اڑایا گیا، آپ کو میرے شہدا نظر نہیں آتے۔ انہوں نے کہا کہ آپ تشدد کی طرف جائیں گے تو تشدد کا راستہ فرعون نے اختیار کیا تھا۔

اس دوران اسپیکر ایاز صادق نے کہا کہ وہ مولانا فضل الرحمان کی تقریر سنیں گے اور جو غیر پارلیمانی الفاظ ہوں گے انہیں حذف کر دیں گے۔ اسپیکر نے مولانا کا ایک جملہ کارروائی سے حذف کر دیا۔

سربراہ جے یو آئی نے کہا کہ ہم کافی عرصے سے لڑے نہیں ہیں، ہمارے ہاتھ لڑنے کے لیے خارش کر رہے ہیں۔

مولانا فضل الرحمان نے کہا کہ دفاعی معاہدہ کہیں ہو رہا ہے اور وزیر دفاع خواجہ آصف یہاں بیٹھے ہیں۔ تہران میں مذاکرات ہو رہے ہیں جبکہ وزیراعظم اور وزیر دفاع یہاں ہیں، کوئی شرم ہوتی ہے، کوئی حیا ہوتی ہے۔

خواجہ آصف کو دیکھ کر مولانا نے مسکراتے ہوئے جملہ کسا، جس پر ایوان میں قہقہے بلند ہو گئے۔

انہوں نے کہا کہ اگر آپ ہر قیمت پر ہمیں رسوا کرنا چاہتے ہیں تو ہم تاریخ کے ہاتھوں نہیں، حکومت کے ہاتھوں مرنا پسند کریں گے۔