ٹرمپ کا دعویٰ: 250 فیصد ٹیرف کی دھمکی سے پاک بھارت جنگ رکی، 11 طیارے گرائے گئے

فلوریڈا: امریکی صدر ڈونلڈ ٹرمپ نے وسط مدتی انتخابات کی مہم کے سلسلے میں ریلی سے خطاب کرتے ہوئے ایک بار پھر مئی 2025 کی پاک بھارت جنگ کا ذکر کیا اور دعویٰ کیا کہ اس دوران 11 طیارے گرائے گئے۔

بھارتی ویب سائٹ وائن (WION) کے مطابق ٹرمپ نے کہا کہ انہوں نے دونوں جوہری طاقتوں سے کہا تھا کہ اگر لڑائی جاری رہی تو وہ امریکا سے تجارت نہیں کر سکیں گے اور دونوں پر 250 فیصد تک بھاری ٹیرف لگایا جائے گا۔ ان کے بقول دونوں ملک شدید ناراض تھے، تاہم بالآخر فائرنگ بند کر دی گئی۔

ٹرمپ نے کہا کہ انہوں نے آٹھ جنگیں رکوائیں، مگر نوبیل انعام نہیں ملا۔ ان کا دعویٰ تھا کہ اس سلسلے میں انہوں نے اقوام متحدہ کو ایک فون کال بھی نہیں کی۔ ان کے مطابق آٹھ میں سے پانچ جنگیں ٹیرف کے ذریعے رکوائی گئیں۔

ٹرمپ نے ایران کے حوالے سے کہا کہ ایران کے خلاف ایک اور آپریشن ہو سکتا ہے اور امریکا جنگ جلد ختم بھی کر سکتا ہے۔ ان کے مطابق ایران کے معاملے کے بعد کیوبا سے نمٹا جائے گا اور ڈیل کو حتمی شکل دینے کے لیے مارکو روبیو کو بھیجا جائے گا۔ انہوں نے یہ بھی کہا کہ آبنائے ہرمز سے تیل کی ترسیل جاری ہے اور جنگ سے پہلے کے مقابلے میں زیادہ تیل برآمد ہو رہا ہے۔

بھارت ٹرمپ کے ثالثی کے دعوے کو بار بار مسترد کر چکا ہے۔ نئی دہلی کا مؤقف ہے کہ فوجی کارروائی روکنے پر مفاہمت دونوں ملکوں کے درمیان براہ راست ہوئی۔ بھارتی بیان کے مطابق اس نے 22 اپریل کے پہلگام حملے کے بعد مئی 2025 میں آپریشن سندور کیا اور 10 مئی کو پاکستان کی درخواست پر کارروائی روکی گئی۔

ٹی آر ٹی ورلڈ کے مطابق پاکستان کا دعویٰ ہے کہ اس نے سات بھارتی طیارے گرائے، جن میں تین رافیل، ایک سخوئی ایس یو 30 اور ایک مگ 29 شامل تھے۔ ادارے کے مطابق بھارتی ذرائع نے ابتدا میں بھارت کے زیر انتظام کشمیر میں تین جنگی طیاروں کے گرنے کا اعتراف کیا، جبکہ بعض بھارتی حکام نے نقصان تسلیم کیا مگر تعداد نہیں بتائی۔ پاکستان نے ٹرمپ کو نوبیل امن انعام کے لیے نامزد کیا تھا۔