ایران پر ممکنہ حملہ: امریکی طیارہ بردار بحری جہاز پر بنکر بسٹر بم لوڈ کیے جانے کا انکشاف

واشنگٹن: صدر ٹرمپ کے مڈٹرم انتخابات سے قبل کوئی فوجی کارروائی نہ کرنے کی واضح پالیسی کے باوجود امریکا نے ایران پر بڑی بمباری کی تیاری مکمل کر لی ہے۔

امریکی میڈیا کے مطابق بحیرہ عرب میں تعینات طیارہ بردار بحری جہاز یو ایس ایس جارج واشنگٹن پر بڑے پیمانے پر اسلحہ لوڈ کیا جا رہا ہے۔ امریکی اخبار کی رپورٹ کے مطابق جہاز کا عملہ بڑی تعداد میں اسٹینڈ آف لینڈ اٹیک میزائل اور بنکر بسٹر بم جہاز پر چڑھا رہا ہے۔

وال اسٹریٹ جرنل کی رپورٹر شیلبی ہولیڈے نے طیارہ بردار جہاز کے نایاب دورے کے دوران گولہ بارود کے ڈبوں کے بڑے ڈھیر اپنی آنکھوں سے دیکھے۔

امریکی حکام نے تصدیق کی ہے کہ فوج ایران کے خلاف ممکنہ نئی کارروائی کے لیے خود کو پوزیشن کر رہی ہے۔

اخبار کے مطابق لوڈ کیے جانے والے ہتھیار خاص طور پر ایران کی زیر زمین ایٹمی تنصیبات اور مضبوط فوجی انفراسٹرکچر کو تباہ کرنے کے لیے موزوں ہیں۔ بنکر بسٹر بم کئی میٹر موٹی کنکریٹ اور چٹانوں کو چیر کر اندر تباہی مچانے کی صلاحیت رکھتے ہیں۔

یہ پیش رفت ایسے وقت میں سامنے آئی ہے جب خلیج میں کشیدگی عروج پر ہے۔ حوثی ریاض پر میزائل داغ رہے ہیں اور آبنائے ہرمز میں آئل ٹینکرز بارودی سرنگوں سے ٹکرا رہے ہیں۔

امریکی انٹیلی جنس پہلے ہی ایران کی جانب سے امریکی اہلکاروں پر حملوں کے خطرے میں اضافے کی وارننگ جاری کر چکی ہے۔