شیخوپورہ میں یونین کونسلز کے سرٹیفکیٹس کے لیے بائیو میٹرک سسٹم کا افتتاح

لاہور: وزیراعلیٰ مریم نواز کے ڈیجیٹل پنجاب، شفاف پنجاب ویژن کے تحت محکمہ بلدیات اور نادرا کے اشتراک سے شہریوں کی سہولت کے لیے اہم سنگ میل عبور کر لیا گیا ہے۔

وزیر بلدیات پنجاب ذیشان رفیق نے شیخوپورہ شہر کے دورے میں یونین کونسلز میں پیدائش، وفات اور شادی سرٹیفکیٹس کے لیے بائیو میٹرک سسٹم کا باضابطہ افتتاح کیا۔

کمپنی باغ میں ہونے والی افتتاحی تقریب میں رکن صوبائی اسمبلی پیر اشرف رسول، ڈائریکٹر جنرل لوکل گورنمنٹ بینش فاطمہ، ڈی جی نادرا، ڈپٹی کمشنر شیخوپورہ رانا عدیل تصور، اے ڈی سی میونسپل سروسز اور شہریوں کی بڑی تعداد موجود تھی۔

نئے سی آر ایم ایس بائیو میٹرک سسٹم کے آغاز سے جعلی اندراج اور بوگس سرٹیفکیٹس کا خاتمہ ہو سکے گا۔

ذیشان رفیق نے بائیو میٹرک سسٹم کے اجرا پر محکمہ بلدیات اور نادرا کی ٹیموں کو خراج تحسین پیش کیا۔ ان کا کہنا تھا کہ وزیراعلیٰ مریم نواز شہریوں کو گھر کی دہلیز پر خدمات کی فراہمی کی قائل ہیں۔

انہوں نے بتایا کہ اس ویژن کے تحت اب ہر سرٹیفکیٹ کا اجرا نادرا کے ڈیٹا بیس سے بائیو میٹرک تصدیق کے بعد ممکن ہو سکے گا۔ ان کے مطابق نئے سسٹم سے نظام میں 100 فیصد شفافیت آئے گی۔