کوئٹہ: ائیرپورٹ کے قریب ہوٹل کی فٹ پاتھ تجاوزات ختم، مالک گرفتار

کوئٹہ: وزیراعلیٰ بلوچستان کی ہدایات اور ڈپٹی کمشنر کوئٹہ مہراللہ بادینی کے احکامات کی روشنی میں ضلعی انتظامیہ کوئٹہ شہریوں کی شکایات کے ازالے اور عوامی راستوں کو تجاوزات سے پاک کرنے کے لیے عملی اقدامات جاری رکھے ہوئے ہے۔

اسی سلسلے میں کھلی کچہری کے دوران موصول ہونے والی شہری کی شکایت پر فوری کارروائی کرتے ہوئے اسسٹنٹ کمشنر (صدر) محمد یوسف ہاشمی نے ائیرپورٹ کے قریب واقع ایک ہوٹل کی جانب سے فٹ پاتھ پر قائم کی گئی تجاوزات کے خلاف کارروائی کی۔

کارروائی کے دوران فٹ پاتھ کو تجاوزات سے کلیئر کروا دیا گیا، جبکہ سرکاری جگہ پر تجاوزات قائم کرنے کے معاملے پر ہوٹل مالک کو گرفتار کر لیا گیا۔

ضلعی انتظامیہ کے مطابق فٹ پاتھ عوام، بالخصوص پیدل چلنے والوں کے لیے مختص ہوتے ہیں، جہاں تجاوزات قائم کرنے سے شہریوں کو مشکلات کا سامنا کرنا پڑتا ہے اور انہیں سڑک پر چلنے پر مجبور ہونا پڑتا ہے، جس سے ٹریفک کی روانی اور شہریوں کی سلامتی بھی متاثر ہو سکتی ہے۔

عوامی راستے تجاوزات سے پاک رکھنے کا عزم

ڈپٹی کمشنر کوئٹہ مہراللہ بادینی کی ہدایات پر ضلعی انتظامیہ شہریوں کی جانب سے کھلی کچہریوں میں پیش کی جانے والی شکایات کو ترجیحی بنیادوں پر حل کرنے کے لیے اقدامات کر رہی ہے تاکہ عوام کو درپیش مسائل کا بروقت ازالہ یقینی بنایا جا سکے۔

ضلعی انتظامیہ نے واضح کیا کہ سرکاری اراضی، فٹ پاتھوں اور عوامی راستوں پر غیر قانونی تجاوزات کسی صورت برداشت نہیں کی جائیں گی۔

شہریوں کی سہولت میں رکاوٹ بننے والوں کے خلاف قانون کے مطابق کارروائی عمل میں لائی جائے گی۔