پنجاب کے 239 سرکاری ہسپتالوں کا فائر سیفٹی آڈٹ مکمل، 710 میں سے 691 ہائیڈرنٹس نصب

لاہور (اعتماد ڈیسک): پنجاب کے 239 سرکاری ہسپتالوں کا فائر سیفٹی آڈٹ مکمل کر لیا گیا ہے، جن میں 56 ٹرشری کیئر، 41 ڈسٹرکٹ ہیڈکوارٹر اور 142 تحصیل ہیڈکوارٹر ہسپتال شامل ہیں۔

آڈٹ رپورٹ کے مطابق ہسپتالوں میں تجویز کردہ 710 فائر ہائیڈرنٹس میں سے 691 نصب ہو چکے ہیں؛ لاہور اور راولپنڈی ڈویژن میں تنصیب 100 فیصد مکمل ہے، جبکہ فیصل آباد میں 89 میں سے 86 اور بہاولپور میں 69 میں سے 61 ہائیڈرنٹس لگائے گئے ہیں۔

سیفٹی مینیجرز والے ہسپتالوں کی تعداد 157 سے بڑھ کر 225 ہو گئی ہے اور 56 ٹرشری ہسپتالوں میں سیفٹی مینیجرز 29 سے بڑھا کر 44 کر دیے گئے ہیں۔ 212 ہسپتالوں کو تجاوزات سے پاک کیا گیا، فائر ایکسٹنگوشرز کی دستیابی 233 سے 238 ہسپتالوں تک پہنچ گئی اور فرسٹ ایڈ باکس اور فائر اسکیپ ماسک رکھنے والے ہسپتال 149 سے بڑھ کر 216 ہو گئے۔

رپورٹ کے مطابق دوسرے فائر سیفٹی آڈٹ میں تمام 7 حفاظتی پیمانوں پر بہتری سامنے آئی، تاہم ہسپتالوں میں حفاظتی انتظامات کو مزید مؤثر بنانے کی ضرورت برقرار ہے۔