جعفرآباد: ڈپٹی کمشنر خالد خان کی زیرِ صدارت چائلڈ پروٹیکشن ریفرل سسٹم کمیٹی کا اجلاس

جعفرآباد: ڈپٹی کمشنر جعفرآباد خالد خان کی زیرِ صدارت ڈسٹرکٹ چائلڈ پروٹیکشن ریفرل سسٹم کمیٹی کا اجلاس منعقد ہوا، جس میں چائلڈ پروٹیکشن کیس مینجمنٹ اور ریفرل سسٹم کا تفصیلی جائزہ لیا گیا۔

اجلاس میں ریفرل پاتھ ویز میں موجود چیلنجز اور خامیوں کی نشاندہی، مختلف اداروں کے درمیان مؤثر رابطے، معلومات کے تبادلے، چائلڈ پروٹیکشن سروسز کی فراہمی کو مضبوط بنانے، متعلقہ اداروں کی استعدادِ کار میں اضافے اور عوامی آگاہی کی سرگرمیوں پر تفصیلی تبادلۂ خیال کیا گیا۔

ڈپٹی کمشنر خالد خان نے کہا کہ بچوں کا تحفظ حکومت کی اولین ترجیحات میں شامل ہے، اور ہر بچے کو محفوظ ماحول، بروقت قانونی و سماجی تحفظ اور بنیادی حقوق کی فراہمی یقینی بنانا تمام متعلقہ اداروں کی مشترکہ ذمہ داری ہے۔

انہوں نے ہدایت کی کہ چائلڈ پروٹیکشن سے متعلق تمام کیسز فوری، شفاف اور مؤثر انداز میں نمٹائے جائیں، اداروں کے درمیان باہمی رابطہ مزید فعال بنایا جائے اور ایسے اقدامات کیے جائیں جن سے بچوں کے حقوق کا ہر سطح پر تحفظ یقینی ہو۔ انہوں نے عزم ظاہر کیا کہ ضلعی انتظامیہ چائلڈ پروٹیکشن نظام کو مزید مؤثر، مربوط اور فعال بنانے کے لیے ہر ممکن تعاون فراہم کرے گی۔

تصویر: بشکریہ ڈی جی پی آر بلوچستان