آئی جی پولیس بلوچستان محمد طاہر نے خیبر پختونخوا تبادلے پر ڈاکٹر سمیع ملک اور فریال فرید کو الوداع کیا

کوئٹہ: انسپکٹر جنرل پولیس بلوچستان محمد طاہر نے سینٹرل پولیس آفس میں ڈاکٹر سمیع ملک اور فریال فرید کو صوبہ خیبر پختونخوا تعیناتی پر الوداع کیا، دونوں افسران کو پولیس یادگاری شیلڈ دی اور بلوچستان پولیس کے لیے ان کی گراں قدر خدمات کو خراجِ تحسین پیش کیا۔

آئی جی پولیس محمد طاہر نے ان کی پیشہ ورانہ خدمات کو سراہتے ہوئے کہا کہ دونوں افسران نے رینجز، کوئٹہ اور سینٹرل پولیس آفس میں مختلف حیثیتوں میں اپنی ذمہ داریاں نہایت دیانت، محنت اور پیشہ ورانہ مہارت سے انجام دیں، جو بلوچستان پولیس اور شہریوں کے لیے باعثِ فخر ہیں۔

انہوں نے کہا کہ ڈاکٹر محمد سمیع ملک اور فریال فرید کی خدمات ہمیشہ قدر کی نگاہ سے دیکھی جائیں گی، اور امید ظاہر کی کہ وہ نئی ذمہ داریوں میں بھی اسی جذبے اور لگن سے فرائض انجام دے کر ادارے کا نام روشن کریں گے۔

تقریب میں ایڈیشنل آئی جی و کمانڈنٹ بلوچستان کانسٹیبلری اشفاق احمد، ایڈیشنل آئی جی آپریشنز شہزاد اکبر، ڈی آئی جی ہیڈکوارٹرز حسن اسد علوی اور ڈی آئی جی پولیس کوئٹہ عمران شوکت سمیت پولیس کے دیگر سینئر افسران بھی موجود تھے، جنہوں نے دونوں افسران کی خدمات کو سراہا اور ان کے روشن مستقبل کے لیے نیک خواہشات کا اظہار کیا۔

تصویر: بشکریہ ڈی جی پی آر بلوچستان