جامعہ تربت کے طلبہ کی اسلام آباد میں ینگ پیس اینڈ ڈیولپمنٹ کورپس فیلوشپ 2026 میں نمایاں کارکردگی

تربت: جامعہ تربت کے طلبہ نے 12 سے 18 اگست 2026 تک اسلام آباد میں منعقدہ ینگ پیس اینڈ ڈیولپمنٹ کورپس (وائی پی ڈی سی) فیلوشپ 2026 میں بھرپور شرکت کر کے نمایاں کارکردگی کا مظاہرہ کیا۔ وفاقی وزارتِ منصوبہ بندی و ترقیات کے زیرِ اہتمام اور یونیسف کے تعاون سے منعقدہ اس فیلوشپ میں پاکستان بھر کی 159 جامعات کے طلبہ و طالبات نے شرکت کی۔

پروگرام میں جامعہ تربت کی نمائندگی وائی پی ڈی سی تربت یونیورسٹی چیپٹر کے صدر محمد مصدق اور چیپٹر کوآرڈینیٹر فاطمہ نذیر نے کی، جنہوں نے پورے پروگرام کے دوران شاندار کارکردگی سے تربت یونیورسٹی کا نام قومی سطح پر روشن کیا۔

سات روزہ فیلوشپ کے دوران شرکا نے یونیسف کے ماہرین اور پلاننگ کمیشن کے حکام کی زیرِ نگرانی گیارہ انٹرایکٹو سیشنز میں حصہ لیا۔ اختتامی تقریب سے خطاب میں وفاقی وزیر منصوبہ بندی و ترقیات احسن اقبال نے قومی ترقی میں نوجوانوں کے کلیدی کردار کو اجاگر کیا۔ پروگرام کے تحت تمام فیلوز کو ایک سالہ ایکشن پلان تفویض کیا گیا، جس کے تحت وہ اپنی جامعات اور کمیونٹیز میں آگاہی مہم چلائیں گے۔

جامعہ تربت کے وائس چانسلر پروفیسر ڈاکٹر گل حسن، ڈائریکٹر اسٹوڈنٹ افیئرز چاکر حیدر اور یونیورسٹی کمیونٹی نے طلبہ کی کاوشوں کو سراہا۔ وائس چانسلر نے اپنے مبارکبادی پیغام میں کہا کہ جامعہ تربت اپنے ڈائریکٹوریٹ آف اسٹوڈنٹ افیئرز کے ذریعے طلبہ کو علاقائی اور قومی سطح پر صلاحیتوں کے اظہار کے مواقع فراہم کرنے کے لیے ہر ممکن اقدامات کر رہی ہے۔

تصویر: بشکریہ ڈی جی پی آر بلوچستان