لورالائی کو ماڈل سٹی بنانے کے لیے میونسپل کمیٹی کا صفائی آپریشن جاری، شہر کے مختلف زونز میں کام

لورالائی: کمشنر لورالائی ڈویژن ولی محمد بڑیچ اور ضلعی انتظامیہ کی ہدایات اور چیف آفیسر میونسپل کمیٹی محب اللہ بلوچ کی خصوصی نگرانی میں لورالائی شہر کو صاف ستھرا، سرسبز اور ماڈل سٹی بنانے کے لیے صفائی کا عمل تسلسل کے ساتھ جاری ہے۔

میونسپل کمیٹی کے صفائی عملے نے شہر کے مختلف زونز میں کچرے، نالیوں، سڑکوں اور بازاروں کی صفائی، کچرے کی منتقلی اور سڑکوں کے کناروں کی بہتری کا کام جاری رکھا۔ کمشنر ہاؤس، طوف روڈ، ڈپٹی کمشنر آفس اور مختلف رہائشی علاقوں میں بھی صفائی اور پانی کے چھڑکاؤ کا عمل مکمل کیا گیا۔

اسی طرح سلیم داد ولی کمپلینٹ زون، دارالعلوم روڈ، صدر بازار، باگی بازار، کاکڑی مسجد روڈ، ڈاکخانہ روڈ، تحصیل روڈ، سبزی منڈی، بخمہ محلہ، انور صاحب گلی اور پولیس لائن سمیت مختلف علاقوں میں نالیوں اور کچرے کی صفائی کی گئی۔ باران زون میں فٹبال اسٹیڈیم کی صفائی کے ساتھ سڑک کے کنارے چنہ ڈالنے کا کام بھی کیا گیا، جبکہ شہر میں لگائے گئے درختوں کو پانی دینے کا سلسلہ بھی جاری ہے۔ آوارہ کتوں کے خاتمے کے لیے کارروائی کے بعد مردہ کتوں کی صفائی اور منتقلی کا عمل بھی مکمل کیا گیا۔

کمشنر ولی محمد بڑیچ نے کہا کہ صاف ستھرا اور خوبصورت لورالائی شہریوں کا حق ہے اور شہر کی صفائی کے لیے تمام دستیاب وسائل بروئے کار لائے جا رہے ہیں۔ انہوں نے متعلقہ اداروں کو صفائی کا معیار برقرار رکھنے اور روزانہ کی بنیاد پر صفائی کا عمل جاری رکھنے کی ہدایت کی۔

چیف آفیسر محب اللہ بلوچ نے کہا کہ میونسپل کمیٹی کا عملہ شہر کے مختلف علاقوں میں مسلسل متحرک ہے، اور صفائی کے ساتھ ساتھ درختوں کی نگہداشت اور شہری ماحول کی بہتری پر بھی خصوصی توجہ دی جا رہی ہے۔

تصویر: بشکریہ ڈی جی پی آر بلوچستان