استامحمد میں سرکاری افسران کے لیے آٹھ پری فیبریکیٹڈ ہاؤسز زیر تعمیر، ڈپٹی کمشنر رمضان پلال کا دورہ

استامحمد: ڈپٹی کمشنر استامحمد محمد رمضان پلال نے ایکسین بلڈنگز یاسین چانڈیو کے ہمراہ ضلع میں زیرِ تعمیر پری فیبریکیٹڈ (Prefabricated) ہاؤسز کا تفصیلی دورہ کیا۔ اس موقع پر ایس ڈی او بلڈنگز عاشق علی بوہڑ بھی موجود تھے۔

ڈپٹی کمشنر نے جاری تعمیراتی کام کا باریک بینی سے جائزہ لیا اور منصوبے کی مجموعی پیش رفت، تعمیراتی معیار، استعمال ہونے والے میٹریل اور تکمیل کے شیڈول پر تفصیلی بریفنگ حاصل کی۔ انہوں نے زور دیا کہ تمام تعمیراتی سرگرمیاں طے شدہ معیارات کے مطابق انجام دی جائیں اور کسی قسم کی غفلت یا تاخیر برداشت نہیں کی جائے گی۔

بریفنگ میں بتایا گیا کہ ضلع استامحمد میں باہر سے تعینات سرکاری افسران کی رہائش کے لیے مجموعی طور پر آٹھ پری فیبریکیٹڈ ہاؤسز تعمیر کیے جا رہے ہیں۔ یہ ہاؤسز جدید طرزِ تعمیر کے حامل ہوں گے اور ان میں بنیادی سہولیات کی فراہمی یقینی بنائی جا رہی ہے تاکہ افسران کو محفوظ، آرام دہ اور معیاری رہائشی ماحول میسر آ سکے۔

ڈپٹی کمشنر محمد رمضان پلال نے کہا کہ ان ہاؤسز کی بروقت تکمیل سے افسران کو بہتر رہائش ملے گی اور سرکاری امور کی انجام دہی میں بہتری آئے گی، جس سے عوامی خدمات کی فراہمی مزید موثر اور تیز ہو سکے گی۔ انہوں نے سختی سے ہدایت کی کہ منصوبہ مقررہ وقت میں مکمل کیا جائے، ہر مرحلے میں معیار، شفافیت اور رفتار برقرار رکھی جائے اور منصوبے کی مسلسل نگرانی کی جائے تاکہ کسی بھی ممکنہ رکاوٹ کو بروقت دور کرکے اسے جلد فعال بنایا جا سکے۔

تصویر: بشکریہ ڈی جی پی آر بلوچستان