گوادر: ایم پی اے مولانا ہدایت الرحمٰن نے محکمہ زراعت کے امیدواروں میں تقرری کے آرڈرز تقسیم کیے

گوادر: محکمہ زراعت حکومت بلوچستان میں بھرتیوں کے سلسلے میں ضلعی کوٹے کی بنیاد پر ضلع گوادر کے اہل امیدواروں میں تقرری کے آرڈرز تقسیم کر دیے گئے۔ اس سلسلے میں رکن صوبائی اسمبلی مولانا ہدایت الرحمٰن بلوچ نے امیدواروں میں باقاعدہ تقرری کے آرڈرز تقسیم کیے۔

اس موقع پر ڈپٹی ڈائریکٹر زراعت توسیع مقبول احمد بلوچ، ایگریکلچر افسر حاجی آمین اللہ پسنی، کوکونٹ فارم کے انچارج وسیم نور اور محکمہ زراعت کے دیگر متعلقہ حکام بھی ان کے ہمراہ تھے۔

تقرریوں کا عمل ضلعی کوٹے کے تحت متعلقہ قواعد و ضوابط کی روشنی میں عمل میں لایا گیا، جس کا مقصد ضلع گوادر کے اہل امیدواروں کو سرکاری ملازمتوں میں نمائندگی اور روزگار کے مواقع فراہم کرنا ہے۔ اس عمل میں میرٹ، علاقائی کوٹے اور مقررہ خواتین کوٹے کو مدنظر رکھا گیا۔

اس پیش رفت سے ضلع گوادر کے اہل نوجوانوں کو سرکاری ملازمتوں کے مواقع میسر آئیں گے، جبکہ محکمہ زراعت میں مقامی افرادی قوت کی شمولیت سے زرعی خدمات اور توسیعی سرگرمیوں کو مزید موثر بنانے میں بھی مدد ملے گی۔