گوادر: ہاشو فاؤنڈیشن کے وفد کی ضلع کونسل گوادر کے چیئرمین شئے مختار بلوچ سے ملاقات

گوادر: ضلع کونسل گوادر کے چیئرمین شئے مختار بلوچ سے ہاشو فاؤنڈیشن کے وفد نے ان کے دفتر میں ملاقات کی، جس میں اقوام متحدہ کے ترقیاتی پروگرام (UNDP) کے تعاون سے گوادر میں جاری موسمیاتی تبدیلی اور سماجی ترقی کے منصوبوں، سرگرمیوں اور پیش رفت پر تفصیلی تبادلہ خیال کیا گیا۔

ملاقات میں سابق ضلع چیئرمین بابو گلاب، چیئرمین جیونی اکرم حیات شہزادہ، چیئرمین پسنی نور احمد کلمتی اور گوادر پریس کلب کے صدر نور محسن بھی موجود تھے۔ وفد میں نوروز واحد اور موسیٰ یار بھی شامل تھے۔

منصوبے کی بریفنگ

اس موقع پر ہاشو فاؤنڈیشن کے پروجیکٹ منیجر اکبر علی نے وفد کے ہمراہ منصوبے کے مقاصد، جاری سرگرمیوں اور مجوزہ اقدامات پر تفصیلی بریفنگ دی۔

آگاہی سیشنز اور مشترکہ اقدامات

ملاقات میں اس بات پر اتفاق کیا گیا کہ موسمیاتی تبدیلی، ماحولیاتی تحفظ اور سماجی ذمہ داریوں سے متعلق شعور اجاگر کرنے کے لیے اسکولوں، کالجوں اور یونیورسٹیوں میں طلباء و طالبات اور اساتذہ کے لیے خصوصی آگاہی سیشنز منعقد کیے جائیں گے، جبکہ مقامی کمیونٹی، نوجوانوں اور متعلقہ سرکاری محکموں کے اشتراک سے ماحولیاتی تحفظ اور پائیدار ترقی کے لیے مشترکہ اقدامات کو فروغ دیا جائے گا۔

مقامی آبادی کی شمولیت

چیئرمین ضلع کونسل شئے مختار بلوچ نے کہا کہ موسمیاتی تبدیلی کے اثرات سے نمٹنے اور ترقیاتی منصوبوں کی مؤثر تکمیل کے لیے مقامی آبادی کو اعتماد میں لینا اور منصوبہ بندی و عملی سرگرمیوں میں ان کی شمولیت ناگزیر ہے۔ انہوں نے زور دیا کہ منصوبوں کے تحت روزگار کے مواقع پیدا ہونے کی صورت میں مقامی نوجوانوں اور اہل علاقہ کو ترجیح دی جائے تاکہ ترقیاتی سرگرمیوں کے ثمرات براہِ راست عوام تک پہنچ سکیں۔

تصویر: بشکریہ ڈی جی پی آر بلوچستان