نصیرآباد: پٹ فیڈر کینال کے کاشتکاروں کو زرعی پانی کی بلاتعطل فراہمی یقینی بنانے کی ہدایت

نصیرآباد: ایگزیکٹو انجینئر پٹ فیڈر کینال شمس الملک بادینی نے کہا ہے کہ کاشتکاروں کو زرعی پانی کی منصفانہ اور بلاتعطل فراہمی محکمہ آبپاشی کی اولین ترجیحات میں شامل ہے۔ پٹ فیڈر کینال کے کمانڈ ایریا میں پانی کی دستیابی اور ترسیل کو بہتر بنانے کے لیے تمام دستیاب وسائل بروئے کار لائے جا رہے ہیں تاکہ کسانوں کو درپیش مشکلات کا ازالہ کیا جا سکے۔

بابا کوٹ کا دورہ

ان خیالات کا اظہار انہوں نے پٹ فیڈر کینال کے 621 آر ڈی بابا کوٹ کے دورے کے موقع پر کیا، جہاں انہوں نے نہری پانی کی فراہمی، بہاؤ اور تقسیم کے نظام کا تفصیلی جائزہ لیا۔ اس موقع پر سب ڈویژنل آفیسر عبدالظاہر مینگل نے انہیں بابا کوٹ اور ملحقہ علاقوں میں زرعی پانی کی موجودہ صورتحال، نہری پانی کی ترسیل اور کاشتکاروں کو فراہم کیے جانے والے پانی کے حوالے سے تفصیلی بریفنگ دی۔

ہدایات اور نگرانی

ایگزیکٹو انجینئر شمس الملک بادینی نے موقع پر موجود متعلقہ عملے کو ہدایات جاری کرتے ہوئے کہا کہ بابا کوٹ کے کاشتکاروں کو درپیش پانی کی قلت کے مسائل کو سنجیدگی سے لیا جائے اور زرعی ضروریات کو مدنظر رکھتے ہوئے پانی کی فراہمی میں مزید اضافے کے لیے مؤثر اقدامات کیے جائیں۔ انہوں نے کہا کہ زراعت ملکی معیشت میں ریڑھ کی ہڈی کی حیثیت رکھتی ہے اور پٹ فیڈر کینال سے وابستہ ہزاروں کاشتکاروں کا روزگار زرعی پانی کی بروقت فراہمی سے منسلک ہے، اس لیے نہری نظام کی نگرانی میں کسی قسم کی غفلت برداشت نہیں کی جائے گی۔

انہوں نے متعلقہ افسران اور عملے کو ہدایت کی کہ نہری پانی کی تقسیم کے نظام کو شفاف اور مؤثر بنایا جائے، ٹیل کے کاشتکاروں تک پانی کی رسائی یقینی بنانے پر خصوصی توجہ دی جائے اور فیلڈ میں موجود مسائل کو فوری طور پر حل کیا جائے تاکہ بابا کوٹ سمیت دیگر زرعی علاقوں کے کاشتکار اپنی فصلوں کی بروقت آبپاشی کر سکیں۔

تصویر: بشکریہ ڈی جی پی آر بلوچستان